Уйғур аптоном райони бойичә сиясий-қанун кадирлар сепини рәткә селиш йиғини чақирилған

Мухбиримиз әзиз
2021-09-29
Share

Хитай һөкүмити башқуришидики "шинҗаң гезити" ниң 29-сентәбирдики хәвиридә ейтилишичә, уйғур диярида хизмәт тәкшүришидә болуватқан мәркәз 16-мупәттишлик гурупписи иккинчи нөвәтлик сиясий-қанун кадирлар қошунини рәткә селиш йиғини ачқан. Йиғинда уйғур аптоном районлуқ сиясий-қанун комитетиниң мудири ваң миңшән ипадә билдүрүп сөз қилған.

Хәвәрдә ейтилишичә, мәркәз тәптиш гурупписиниң гуруппа башлиқи фу җичяң уйғур дияридики сиясий-қанун қошуниниң өткән бирнәччә йилдики хизмитигә юқури баһа бәргән, шундақла "партийә мәркизий комитетиниң шинҗаңдики хизмәт орунлаштурушини толуқ иҗра қилишта күчлүк рол ‍ойниди" дегән. У йәнә сиясий-қанун қошуниниң хизмитидики йетәрсиз амиллар тоғрисидиму тохтилип: "һечқандақ йошурун хәвпни қалдурмаслиқ", "мәсилини түп йилтизидин һәл қилиш лазим" дегән. Ваң миңшән болса бу пикирләрни толуқ қобул қилидиғанлиқини билдүрүш билән биргә "бундин кейинки хизмәтни техиму мукәммәлләштүрүп мәркәзниң омуми пилани вә узун мәзгиллик әминликкә мутләқ кепиллик қилидиғанлиқи" ни ейтқан.

Хитай һөкүмитиниң бу қетимқи йиғини һәққидә сөз болғанда америкадики мустәқил анализчи илшат һәсән өткәнки вәзийәтни әсләп өткәч, буниң әмәлийәттә бейҗиң даирилириниң уйғур дияридики тутқун вә бастурушни техиму кеңәйтиш һәққидә көрсәтмә беришидин башқа нәрсә ‍әмәсликини тәкитлиди. У бу һәқтә сөз қилип: "биз һазир ‹нәччә милйон уйғур тутулуп болди' дәватимиз. Әмма хитай мәркизий тәптиш гурупписиниң мушундақ реаллиқниму техи йетәрлик болмиди, дегәнлики уларниң пүткүл уйғурларни йоқ қилмиғучә болди қилмаймиз, дегәнликигә баравәрдур," деди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт