Bayin'gholinda 3000 neper kadir siyasiy-qanun terbiyesi bérishke orunlashturulghan

Muxbirimiz irade
2018-05-24
Élxet
Pikir
Share
Print

Uyghur rayon da'iriliri ammigha qaratqan siyasiy-idé'ologiye teshwiqatini üzlüksiz kücheytiwatqanliqi melum.

Bügün, "Tengritagh" torida bérilgen xewerde melum bolushiche, bayin'gholin oblastidiki 3000 neper kadir hazir kocha-koy we öy-öylerge kirip, xitayning "Asasiy qanuni", "Nazaretchilik qanuni" ni chüshendürüsh we rayonda barliqqa kelgen atalmish "Alemshumul özgirishler" ni teshwiq qilishqa orunlashturulghan.

Xewerde, mezkur heriketning 20-may küni bashlan'ghanliqi we buning bilen bayin'gholindiki "Siyasiy terbiye shamilining 500 ming neper kadir we ammigha yétip baridighanliqi" bayan qilin'ghan.

Uyghur rayon da'irilirining yüz minglighan Uyghurni yépiq terbiye lagérlirigha solash arqiliq ulargha mejburiy halda siyasiy-idiye terbiyesi bériwatqanliqi tenqidliniwatqan bir shara'itta, bu lagérlardin aman qalghanlarningmu sirtta türlük-tümen teshwiqat heriketlirige orunlashturuluwatqanliqi, bu heriketlerde yashlarning asasiy nishan boluwatqanliqi melum.

Téxi yéqinda Uyghur rayonluq partkomning mu'awin sékrétari li péngshin Uyghur rayonidiki yashlar ittipaqining yighinida söz qilghanda "Yashlar we ösmürlerge qaritilghan kommunistik idiye terbiyesini kücheytishni tekitligen. U sözide, "Yashlarning siyasiy mes'uliyiti we islahatining toghra yönilishini puxta igilesh arqiliq, shinjangning ijtima'iy muqimliq we ebediy eminlik bash nishanini ishqa ashurush üchün tiriship küresh qilishi kéreklikini" bildürgen.

Xitay hökümiti "Bash nishan" ni ishqa ashurushni hemme yerde dawamliq tekitlep kéliwatqan bolsimu, emma bu atalmish "Bash nishan" ning zadi némidin dérek béridighanliqini tilgha almay kelmekte.

Toluq bet