Америка президенти «теңшүн» вә «зиҗйе тявдоң» ширкәтлириниң америкада сода қилишини чәклиди

Мухбиримиз әркин
2020-08-07
Елхәт
Пикир
Share
Принт

Америка президенти доналд трамп 7-июл күни мәмурий буйруққа имза қоюп, америка ширкәтлири вә шәхсләрниң хитайниң «теңшүн» вә «зиҗйе тявдоң» ширкәтлири билән сода алақисидә болушини чәклиди.

Президент трамп мәмурий буйруқида хитайниң икки чоң иҗтимаий алақә юмтали тикток билән үндидарниң игиси болған «зиҗйе тявдоң» вә «теңшүн» ширкәтлиригә 45 күн мөһләт берип, америкада бу ширкәтләр билән болған содиниң чәклинидиғанлиқини елан қилди. Президент трампниң мәмурий буйруқида тәкитлишичә, үндидар билән тикток америкалиқ абунтларниң учурини топлап, хитай компартийәсини бу учурлар билән тәминләп кәлгән икән.

Президент трамп дөләт бихәтәрликини қоғдаш үчүн бу икки ширкәткә қарши җиддий һәрикәткә өткәнликини билдүрди. Үндидар билән тикток, болупму үндидар илгири уйғурларниң әң муһим алақилишиш қорали болуп кәлгән. Уйғур кишилик һоқуқ тәшкилатлириниң тәкитлишичә, үндидар хитай һөкүмитиниң 2017-йили башланған чоң тутқунида милйонлиған уйғур вә башқа йәрлик мусулман милләтләрниң тутқун қилинип, лагерларға қамилиши, қамақ җазалириға һөкүм қилинишида һалқилиқ рол ойниған икән.

Президент трамп мәмурий буйруқида үндидар абунтларниң учурини аптоматик топлап, хитай компартийәсиниң америка пуқралириниң шәхсий учуриға еришишигә йол қоюп кәлгәнлики, американи зиярәт қилған хитай пуқралирини назарәт қилидиғанлиқи, тиктокниң сахта учур тарқитишқа ишлитилип, буниңдин хитай компартийәсиниң пайдиға еришип кәлгәнликини тәкитлиди. Униң тәкитлишичә, буниңға қарши американиң «күчлүк һәрикәт қоллинип, дөләт бихәтәрликини қоғдиши зөрүр» бир әһвалға кәлгән.

Пикирләр (0)
Share
Толуқ бәт