Amérika prézidénti "Téngshün" we "Zijyé tyawdong" shirketlirining amérikada soda qilishini cheklidi

Muxbirimiz erkin
2020-08-07
Share

Amérika prézidénti donald tramp 7-iyul küni memuriy buyruqqa imza qoyup, amérika shirketliri we shexslerning xitayning "Téngshün" we "Zijyé tyawdong" shirketliri bilen soda alaqiside bolushini cheklidi.

Prézidént tramp memuriy buyruqida xitayning ikki chong ijtima'iy alaqe yumtali tiktok bilen ündidarning igisi bolghan "Zijyé tyawdong" we "Téngshün" shirketlirige 45 kün möhlet bérip, amérikada bu shirketler bilen bolghan sodining cheklinidighanliqini élan qildi. Prézidént trampning memuriy buyruqida tekitlishiche, ündidar bilen tiktok amérikaliq abuntlarning uchurini toplap, xitay kompartiyesini bu uchurlar bilen teminlep kelgen iken.

Prézidént tramp dölet bixeterlikini qoghdash üchün bu ikki shirketke qarshi jiddiy heriketke ötkenlikini bildürdi. Ündidar bilen tiktok, bolupmu ündidar ilgiri Uyghurlarning eng muhim alaqilishish qorali bolup kelgen. Uyghur kishilik hoquq teshkilatlirining tekitlishiche, ündidar xitay hökümitining 2017-yili bashlan'ghan chong tutqunida milyonlighan Uyghur we bashqa yerlik musulman milletlerning tutqun qilinip, lagérlargha qamilishi, qamaq jazalirigha höküm qilinishida halqiliq rol oynighan iken.

Prézidént tramp memuriy buyruqida ündidar abuntlarning uchurini aptomatik toplap, xitay kompartiyesining amérika puqralirining shexsiy uchurigha érishishige yol qoyup kelgenliki, amérikani ziyaret qilghan xitay puqralirini nazaret qilidighanliqi, tiktokning saxta uchur tarqitishqa ishlitilip, buningdin xitay kompartiyesining paydigha ériship kelgenlikini tekitlidi. Uning tekitlishiche, buninggha qarshi amérikaning "Küchlük heriket qollinip, dölet bixeterlikini qoghdishi zörür" bir ehwalgha kelgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.