Сода урушиниң тәсиридә чәтәл ширкәтлири хитайдин көпләп чекинмәктә

Мухбиримиз әркин
2019-07-19
Елхәт
Пикир
Share
Принт

Америка-хитай сода урушиниң тәсиридә чәтәл ширкәтлириниң хитайдин көпләп чекинип чиқиватқанлиқи илгири сүрүлди. «Никкей асияға нәзәр» намлиқ төт журнилиниң ашкарилишичә, америка һөкүмити хитай мәһсулатлириға баҗ қоюшқа башлиғандин бери әпел, нинтәндо, делни өз ичигә алған 50 тин артуқ хәлқара ширкәт өзлириниң хитайдики карханилирини йөткәп чиқишқа киришкән.

Америка-хитай сода уруши башланған өткән йилдин бери трамп һөкүмити хитайниң 200 милярд долларлиқ импорт мәһсулатиға 25% баҗ қойған. Нөвәттә, президент трамп хитайниң йәнә 325 милярд долларлиқ мәһсулатқа баҗ қойидиғанлиқини давамлиқ агаһландурмақта.

«Никкей асияға нәзәр» журнилида қәйт қилинишичә, сода урушиниң җиддийлишишигә әгишип, техиму көп хәлқара ширкәтләр карханилирини хитайдин йөткәп чиқишни пиланлимақта яки йөткәп чиқишни ойлашмақтикән. Хәвәрдә, американиң компютер ишләпчиқириш ширкити HP билән DEL ниң хитайдики ишләпчиқириш карханилириниң 30% ни шәрқий-җәнубий асия дөләтлиригә йөткәп кетидиғанлиқини билдүргәнлики ейтилған. Хәвәрдә қәйт қилинишичә, алма ширкити әгәр өзиниң хитайдики 15% тин 30% кичә болған ишләпчиқириш карханилирини һиндистанға йөткисә, униңға қанчилик чиқим кетидиғанлиқини һесаблап чиқишни тәләп қилған.

Хәвәрдә йәнә японийә нентәндо ширкитиниң бир қисим карханилирини вийетнамға йөткәп келидиғанлиқи тәкитләнгән. Хәвәрдә баян қилинишичә, нөвәттә сода уруши хитайниң иқтисади өсүш сүритигә тәсир көрситишкә башлиған. Хитай һөкүмити өткән дүшәнбә күни хитай иқтисадиниң өсүш сүрити бу йилниң 2‏-чарикидә 2.6 Пирсәнткә чүшкәнликини елан қилған. Бу хитай иқтисадиниң өсүш сүритиниң йеқинқи 27 йил ичидә тунҗи қетим 2.6 Пирсәнткә чүшүшидур. Президент трамп бу әһвални хитайниң сода урушида уттуриватқанлиқиниң дәлили, дәп тәкитлигән. У өткән дүшәнбә күни тввитирда йоллиған язмисида, «америкиниң баҗ қоюши ширкәтләрниң хитайдин айрилип, баҗ қоймиған дөләтләргә йөткилишидики асаслиқ амил. Миңлиған ширкәтләр чекинип чиқмақта. Мана бу униң немә үчүн сода келишими имзалашни тәләп қилишидики сәвәбтур» дегән. Ройтерсниң 19‏-июл тартқатқан йәнә бир хәвиридә қәйт қилинишичә, нөвәттә һөкүмәт, аилә вә ширкәтләрниң қәрзи шиддәтлик тартмақтикән. Хәвәрдә, һөкүмәт, аилә вә ширкәтләрниң омуми қәрзи бу йилниң 1‏-чарикидә хитай омуми ишләпчиқириш миқдариниң 303% гә тоғра келидиғанлиқи билдүрүлгән.

Пикирләр (0)
Share
Толуқ бәт