Soda urushining tesiride chet'el shirketliri xitaydin köplep chékinmekte

Muxbirimiz erkin
2019-07-19
Élxet
Pikir
Share
Print

Amérika-xitay soda urushining tesiride chet'el shirketlirining xitaydin köplep chékinip chiqiwatqanliqi ilgiri sürüldi. "Nikkéy asiyagha nezer" namliq töt zhurnilining ashkarilishiche, amérika hökümiti xitay mehsulatlirigha baj qoyushqa bashlighandin béri epél, nintendo, délni öz ichige alghan 50 tin artuq xelq'ara shirket özlirining xitaydiki karxanilirini yötkep chiqishqa kirishken.

Amérika-xitay soda urushi bashlan'ghan ötken yildin béri tramp hökümiti xitayning 200 milyard dollarliq import mehsulatigha 25% baj qoyghan. Nöwette, prézidént tramp xitayning yene 325 milyard dollarliq mehsulatqa baj qoyidighanliqini dawamliq agahlandurmaqta.

"Nikkéy asiyagha nezer" zhurnilida qeyt qilinishiche, soda urushining jiddiylishishige egiship, téximu köp xelq'ara shirketler karxanilirini xitaydin yötkep chiqishni pilanlimaqta yaki yötkep chiqishni oylashmaqtiken. Xewerde, amérikaning kompyutér ishlepchiqirish shirkiti HP bilen DEL ning xitaydiki ishlepchiqirish karxanilirining 30% ni sherqiy-jenubiy asiya döletlirige yötkep kétidighanliqini bildürgenliki éytilghan. Xewerde qeyt qilinishiche, alma shirkiti eger özining xitaydiki 15% tin 30% kiche bolghan ishlepchiqirish karxanilirini hindistan'gha yötkise, uninggha qanchilik chiqim kétidighanliqini hésablap chiqishni telep qilghan.

Xewerde yene yaponiye néntendo shirkitining bir qisim karxanilirini wiyétnamgha yötkep kélidighanliqi tekitlen'gen. Xewerde bayan qilinishiche, nöwette soda urushi xitayning iqtisadi ösüsh süritige tesir körsitishke bashlighan. Xitay hökümiti ötken düshenbe küni xitay iqtisadining ösüsh sür'iti bu yilning 2‏-charikide 2.6 Pirsentke chüshkenlikini élan qilghan. Bu xitay iqtisadining ösüsh süritining yéqinqi 27 yil ichide tunji qétim 2.6 Pirsentke chüshüshidur. Prézidént tramp bu ehwalni xitayning soda urushida utturiwatqanliqining delili, dep tekitligen. U ötken düshenbe küni twwitirda yollighan yazmisida, "Amérikining baj qoyushi shirketlerning xitaydin ayrilip, baj qoymighan döletlerge yötkilishidiki asasliq amil. Minglighan shirketler chékinip chiqmaqta. Mana bu uning néme üchün soda kélishimi imzalashni telep qilishidiki sewebtur" dégen. Roytérsning 19‏-iyul tartqatqan yene bir xewiride qeyt qilinishiche, nöwette hökümet, a'ile we shirketlerning qerzi shiddetlik tartmaqtiken. Xewerde, hökümet, a'ile we shirketlerning omumi qerzi bu yilning 1‏-charikide xitay omumi ishlepchiqirish miqdarining 303% ge toghra kélidighanliqi bildürülgen.

Toluq bet