Amérika bilen xitay "Soghuq munasiwetler urushi" gha kiriwatamdu?

Muxbirimiz eziz
2021-06-30
Share

Yéqinqi mezgillerdin buyan amérika bilen xitay otturisidiki munasiwetning barghanséri yirikliship méngishi ikki terep otturisidiki omumiy alaqini yéngidin bashliniwatqan "Soghuq munasiwetler urushi" dep teswirleshke yüzlenmekte. Bolupmu amérika tashqiy ishlar minsitiri antoni bilinkén ötken hepte parizh shehride "Nyo-york waqti géziti" ning ziyaritini qobul qilghanda "Erkinlik dunyasini xitayning tesiridin qoghdashta amérika bilen fransiye bir qéyiqta üziwatidu," dégen.

CNN Agéntliqining bu heqtiki obzor maqalisida körsitilishiche, antoni bilinkén tilgha alghan bu mesile emeliyette amérika prézidénti jow baydénning "Démokratiye hazir éghir tehditke duch kéliwatidu" dégen agahlandurushining yene bir qétim tekrarlini'ishi iken. Yene kélip ilgiriki "Soghuq munasiwetler urushi" mezgilide amérika bilen sabiq sowét ittipaqi idé'ologiyelik toqunushni merkez qilghan bolsa, xitay bilen amérika otturisidiki "Soghuq munasiwetler urushi" bashqiche xaraktérde ipadilenmekte iken. Bolupmu xitay re'isi shi jinping xitay kompartiyesi qurulghanliqining 100 yilliqini tebrikleshke aldirash bilen birge tinch okyandin halqighan halda zulum we zomigerlikni tashqiy dunyagha kéngeytish bilen meshghul bolmaqta iken.

Obzorda körsitilishiche, gerche xitayning dunya miqyasida démokratiyege qarshi urush qozghishi namelum bolsimu, emma xitay bilen amérika otturisidiki soghuq munasiwetler urushining dawam qilishi éniq, dep qaralmaqta iken. Bolupmu shi jinpingning xitay milletchiliki xahishini küchep bazargha sélishining xitay kompartiyesini saqlap qélish hiylisi yaki xitay hökümitining dunyagha xoja bolush qara niyitining ashkarilinishi ikenliki heqqide hazir köp xil pikirler otturigha chiqmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet