Уйғур елидики һәр дәриҗилик сот мәһкимилири сотчилириниң алмаштурулуши диққәт қозғиди

Мухбиримиз ирадә
2021-04-01
Share

Бүгүн хитайниң һөкүмәт тор бәтлиридә уйғур аптоном районлуқ хәлқ қурултийи даимий комитетиниң вәзипигә тәйинләш-қалдуруш исимлики елан қилинди.

Диққәт қозғайдиғини, 3-айниң 25-күни уйғур районлуқ 13-нөвәтлик хәлқ қурултийи даимий комитетиниң 24-қетимлиқ йиғинида мақулланған қарарға асасән, уйғур аптоном районлуқ сот мәһкимисидин тартип, һәрқайси дәриҗилик йәрлик сот мәһкимилириниң әслидики сотчилири вәзипидин қалдурулуп, йеңи кишиләр вәзипигә тәйинләнгән.

Әдлийә саһәсидики бу зор көләмлик вәзипидин қалдуруш вә тәйинләш һәрикити чәтәлләрдики уйғур көзәткүчиләрниң күчлүк диққитини қозғиди.

Көзәткүчиләрниң қаришичә, хитай һөкүмити уйғур елида йүргүзүватқан ирқий қирғинчилиқи сәвәбидин хәлқарада күчлүк бесимға дуч келиватқан бир мәзгилдә бундақ зор көләмдә вәзипә алмаштуруш қилиши гуман қозғайдикән. Улар буниң җинайәтләргә аит пакитларни йоқитишни мәқсәт қилған болуши мумкинликини билдүрүшти.

Уйғур аптоном районлуқ хәлқ қурултийи даимий комитетиниң вәзипигә тәйинләш-қалдуруш қарарнамисидә йәнә, илгири хотән вилайәтлик партком секретари, шинҗаң ишләпчиқириш-қурулуш биңтуәни 14-девизийәси парткоминиң 1-секретари қатарлиқ вәзипиләрни өтигән яң фасенниң уйғур аптоном районлуқ хәлқ һөкүмитиниң муавин рәисликигә тәйинләнгәнликиму уқтурулған.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт