Wilson merkizi sabiq sowétler ittipaqining 1935-we 1936 yili Uyghur élidin adem terbiyeleshke ajratqan meblighini ashkara qilghan

Muxbirimiz qutlan
2016-11-20
Share

Uyghur élining 1930-we 1940-yilliridiki tarixiy weziyitining sabiq sowétler ittipaqining küchlük tesir da'iriside bolghanliqi hemmige melum.

Halbuki, sabiq sowétler ittipaqi yimirilip, aridin 20 nechche yil ötken bolsimu, emma rusiye mexpiy arxipliridiki Uyghur éligha da'ir höjjetlerning toluq ashkara bolmasliqi tarixchilargha hélihem qiyinchiliq tughdurmaqtiken.

Washin'gtondiki wilson tetqiqat merkizining soghuq urush dewrige béghishlan'ghan arxip ambiri bu jehette intayin muhim höjjetlerni ashkara qilmaqta.

Wilson merkizi yéqinda sabiq sowétler ittipaqining 1935-yilidin tartip Uyghur élidin sowétke mahil adem terbiyelesh üchün yiligha 1 milyun 200 ming rubliy meblegh ajratqanliqi heqqidiki ikki parche muteq mexpiy höjjetni ashkarilighan.

Birinchi parche höjjet sowét ittipaqi kompartiyesi siyasiy byurosi teripidin 1935-yili 31-awghust küni chiqirilghan bolup, uningda Uyghur élidin sowét ittipaqigha yétip kelgen kishiler üchün jem'iy 1 milyun 200 ming rubliy meblegh ajritish toghrisida n k w d, yeni sowét ittipaqi dölet xewpsizliki komitétigha uqturush qilin'ghan.

Ikkinchi parche höjjet sowét ittipaqi kompartiyesi siyasiy byurosi teripidin 1936-yili 20-april küni chiqirilghan bolup, uningda n k w d, yeni sowét ittipaqi dölet xewpsizliki komitétining Uyghur élidin sowét ittipaqigha barghan kishiler üchün jem'iy 1 milyun 206 ming rubliy serp qilishini testiqlighan.

Halbuki, mezkur hojjetlerde Uyghur élidin sowét ittipaqigha yétip barghan kishilerning kimliki eskertilmigen. Bir qisim tetqiqatchilar, bu pul belkim 1935-we 1936-yilliri tashkent dölet uniwérsitétigha oqushqa chiqqan Uyghur we bashqa millet oqughuchilirigha ajritilghan bolushi mumkinlikini qiyas qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet