Wilson merkizi stalinning 1934-yili iyulda shéng shiseyge qayturghan jawab mektubini élan qilghan

Muxbirimiz qutlan
2017-01-21
Share

Bash shitabi washin'gtondiki wilson tetqiqat merkizi yéqinda sabiq sowét ittipaqi rehbiri stalinning 1934-yili 27-iyul küni shéng shiseyge yazghan bir parche jawab mektubini élan qilghan.

Stalinning bu mektubi shéng shiseyning 1934-yili 6-ayda stalin'gha yollighan tunji mektubigha bérilgen jawab iken.

Mezkur mektubta stalin öz nami hemde molotof we woroshilofning namidin shéng shiseyge munularni qeyt qilghan:

"Shéng shisey ependi, biz sizning 1934-yili iyunda yazghan mektubingizni tapshurup alduq. Sizning intayin dostane héssiyatingizgha teshekkür bildürimiz. Shek-shübhisizki, sizning tirishchanliqingiz we qaytmas iradingiz bolmighinida shinjangda tinchliq ornitilmighan bolatti. Biz bu yerde sizge töwendiki birqanche nuqtini eskertip ötmekchimiz. Birinchidin, sizning intayin téz sür'et bilen shinjangda kommunizmni yolgha qoymaqchi bolghanliqingizni emeliyetke uyghun emes, dep qaraymiz. Ikkinchidin, sizning shinjangni baza qilip turup nenjing hökümitini aghdurup tashlash pilaningizni toghra emes dep qaraymiz. Üchinchidin, sizning kommunistik partiyege eza bolushingizni hazirche muwapiq emes, dep oylaymiz. Tötinchidin, sizge ishinish mesiliside biz aliqachan emeliy herikitimiz bilen buni ispatliduq. Bizning sizge yardem qilishimiz we yol körsitishimizning özi sizge ishen'genlikimizning ipadisi, dep bilishingizni soraymiz."

Stalinning mektubi nahayiti éniqki, shéng shiséyning Uyghur diyarida kommunizm sistémisini ornitish, nenjingdiki gomindang hökümitidin qol üzüp, musteqil kénezlik tiklesh hemde stalin'gha yaxshichaq bolup, sowét bolshéwiklar partiyesige eza bolush qatarliq pilanlirini ret qilghan. Stalinning bu jawab mektubi uning shéng shiseyge téxiche toluq ishench turghuzalmighanliqi we uni bir mezgil közitish xiyalida ikenlikini körsitip bergen.

Tarixchilar, 1934-yili shéng shisey bilen stalin ariliqida Uyghur diyarining teqdiri mesiliside yézishqan mutleq mexpiy mektublar eyni dewrdiki Uyghur diyarining murekkep tarixiy shara'itini tetqiq qilishta muhim tarixiy höjjetlik qimmitige ige, dep qarimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.