Қәшқәр шәһиридә чоң вә пәвқуладдә чоң йәр асти су мәнбәси байқалғанлиқи хәвәр қилинди

Мухбиримиз ирадә
2013.12.18
Share on WhatsApp
Share on WhatsApp

Бүгүн шинхуа хәвәрләр тори қәшқәр шәһиридә чоң йәр асти су мәнбәси байқалғанлиқини хәвәр қилди. Униңда ейтилишичә, уйғур аптоном районлуқ геологийә тармақлири икки йилға йеқин тәкшүрүш арқилиқ қәшқәр шәһири әтрапида йеңидин чоң вә пәвқуладдә чоң йәр асти су мәнбәси вә су билән тәминләш нишан районидин иккини байқиған.

Бу икки нишан райони болса улуғата дәрясиниң шәрқ тәрипи билән күсән дәрясиниң шимал тәрипигә тоғра келидиған болуп, дәсләпки қәдәмдә елишқа болидиған күнлүк йәр асти сүйи миқдари 420 миң кубметирға йетидикән.

Хитай һөкүмити 2010-йилидики шинҗаң хизмити йиғинидин кейин қәшқәр шәһирини иккинчи шенҗен қилип қуруп чиқиш пиланини оттуриға қоюп, қәшқәр шәһириниң нопусини бир милйонға йәткүзүш вә қәшқәрдә иқтисадий тәрәққият райони қурулушини башливәткән иди. Қәшқәргә техиму көп көчмән йөткәш вә завут-кархана ечиштин бешарәт беридиған бу қурулуш пилани екологийә саһәсидики мутәхәссисләр вә шундақла чәтәлләрдики уйғурларниң қаттиқ қаршилиқиға дуч кәлгән. Улар, қәшқәрдә су мәнбәсиниң интайин кәмчилликини вә бир мо йәргә тоғра келидиған адәм саниниң әслидила интайин зичлиқини, әгәр пилан йолға қоюлған тәқдирдә буниң қәшқәрниң екологийисигә қаттиқ бузғунчилиқ елип келидиғанлиқини агаһландурған иди.

Әмма бүгүн шинхуаниң хәвиридә юқиридикиләрниң әксичә, бу қетим тепилған икки орундики йәр асти су байлиқи қәшқәр вә қәшқәр иқтисадий тәрәққият райониниң йеқинқи вә узақ мәзгилгичә бир милйон нопус яки униңдин артуқ нопусниң су мәсилисини һәл қилишидин үмид бар, 2020-йилиға барғанда 1 милйон 110 миң нопусниң, 2030-йили нопус 1 милйон 560 миңға йәткәндә, бу аһалиләрниң йәнила су истемал қилиш еһтияҗини қамдап кетәләйду, дәп хәвәр қилған.

Уйғур көзәткүчиләр, хитай һөкүмитиниң бу су мәнбәсини баһанә қилип туруп, қәшқәргә техиму көп көчмән хитай йөткәйдиғанлиқини билдүрди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.