Qeshqer shehiride chong we pewqul'adde chong yer asti su menbesi bayqalghanliqi xewer qilindi

Muxbirimiz irade
2013.12.18
Share on WhatsApp
Share on WhatsApp

Bügün shinxu'a xewerler tori qeshqer shehiride chong yer asti su menbesi bayqalghanliqini xewer qildi. Uningda éytilishiche, Uyghur aptonom rayonluq gé'ologiye tarmaqliri ikki yilgha yéqin tekshürüsh arqiliq qeshqer shehiri etrapida yéngidin chong we pewqul'adde chong yer asti su menbesi we su bilen teminlesh nishan rayonidin ikkini bayqighan.

Bu ikki nishan rayoni bolsa ulugh'ata deryasining sherq teripi bilen küsen deryasining shimal teripige toghra kélidighan bolup, deslepki qedemde élishqa bolidighan künlük yer asti süyi miqdari 420 ming kubmétirgha yétidiken.

Xitay hökümiti 2010-yilidiki shinjang xizmiti yighinidin kéyin qeshqer shehirini ikkinchi shénjén qilip qurup chiqish pilanini otturigha qoyup, qeshqer shehirining nopusini bir milyon'gha yetküzüsh we qeshqerde iqtisadiy tereqqiyat rayoni qurulushini bashliwetken idi. Qeshqerge téximu köp köchmen yötkesh we zawut-karxana échishtin bésharet béridighan bu qurulush pilani ékologiye sahesidiki mutexessisler we shundaqla chet'ellerdiki Uyghurlarning qattiq qarshiliqigha duch kelgen. Ular, qeshqerde su menbesining intayin kemchillikini we bir mo yerge toghra kélidighan adem sanining eslidila intayin zichliqini, eger pilan yolgha qoyulghan teqdirde buning qeshqerning ékologiyisige qattiq buzghunchiliq élip kélidighanliqini agahlandurghan idi.

Emma bügün shinxu'aning xewiride yuqiridikilerning eksiche, bu qétim tépilghan ikki orundiki yer asti su bayliqi qeshqer we qeshqer iqtisadiy tereqqiyat rayonining yéqinqi we uzaq mezgilgiche bir milyon nopus yaki uningdin artuq nopusning su mesilisini hel qilishidin ümid bar, 2020-yiligha barghanda 1 milyon 110 ming nopusning, 2030-yili nopus 1 milyon 560 minggha yetkende, bu ahalilerning yenila su istémal qilish éhtiyajini qamdap kételeydu, dep xewer qilghan.

Uyghur közetküchiler, xitay hökümitining bu su menbesini bahane qilip turup, qeshqerge téximu köp köchmen xitay yötkeydighanliqini bildürdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.