Хитай мутәхәссислири байқал көлиниң сүйини туруба арқилиқ тошуп келиш пилани түзгән

Мухбиримиз үмидвар
2017.03.01

Йеқинда хитай мутәхәссислири русийәниң байқал көлидин гәнсуға су йәткүзүш пиланини оттуриға қойған болуп, рус тилидики “улуғ ера” гезитиниң хитайниң “йәр шари вақти” гезитини мәнбә қилип таратқан бу һәқтики учуридин мәлум болушичә, гәнсу өлкисиниң мәркизи ләнҗу шәһиридики шәһәр вә йеза пиланлаш институтиниң хадимлири байқал көлидин, гәнсуниң чиләншән тағлири райони вә ләнҗу шәһиригә тутишидиған 1700 километирлиқ туруба ятқузуп, байқал көлиниң сүйини бу җайларға тошуп келип, еғирлишиватқан қурғақчилиқ мәсилини һәл қилиш һәққидә бир пилан лайиһисини оттуриға қойған.

Мәзкур пиланни түзгүчиләр бу туруба қурулушини әмәлгә ашуруш тәс әмәсликини, чүнки һазир хитай билән русийәниң яхши мунасивәттә икәнликини билдүрүшкән. Әмма, мәзкур пиланниң русийә билән хитай арисида муһакимә қилинғанлиқи һәққидә учур йоқ.

Хәвәрдә ейтилишичә, хитайни русийәниң су мәнбәлири билән тәминләш мәсилиси һәтта русийәликләр тәрипидинму оттуриға қоюлған болуп, илгири русийә йеза игилик министири александир ткачйов русийәниң алтай өлкисидин уйғур аптоном районини 70 милйон кубметир су билән тәминләш, һәтта буни бир милярд кубметирғичә йәткүзүш идийисини оттуриға қойған икән.

Русийә хәвәрлиридин мәлум болушичә, хитай байқал көлиниң саяһәтчилик вә су ишлириға мәбләғ селишқа киришкән болуп, һәтта хитай байқал көлидә су чәккиләп бутулкиларға қачилаш билән шуғуллинидиған 4 завут қурушқа тутуш қилған. Әмма бу, мәзкур райондики бурят миллитиниң, бурятийә җумһурийити аһалисиниң наразилиқиға учриған болуп, бурят муһит қоғдиғучилири хитай завутлириниң байқал көлиниң екологийисигә бузғунчилиқ елип келишидин әндишә қиливатқанлиқлирини билдүргән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.