Xitay mutexessisliri bayqal kölining süyini turuba arqiliq toshup kélish pilani tüzgen
2017.03.01
Yéqinda xitay mutexessisliri rusiyening bayqal kölidin gensugha su yetküzüsh pilanini otturigha qoyghan bolup, rus tilidiki “Ulugh éra” gézitining xitayning “Yer shari waqti” gézitini menbe qilip taratqan bu heqtiki uchuridin melum bolushiche, gensu ölkisining merkizi lenju shehiridiki sheher we yéza pilanlash institutining xadimliri bayqal kölidin, gensuning chilenshen taghliri rayoni we lenju shehirige tutishidighan 1700 kilométirliq turuba yatquzup, bayqal kölining süyini bu jaylargha toshup kélip, éghirlishiwatqan qurghaqchiliq mesilini hel qilish heqqide bir pilan layihisini otturigha qoyghan.
Mezkur pilanni tüzgüchiler bu turuba qurulushini emelge ashurush tes emeslikini, chünki hazir xitay bilen rusiyening yaxshi munasiwette ikenlikini bildürüshken. Emma, mezkur pilanning rusiye bilen xitay arisida muhakime qilin'ghanliqi heqqide uchur yoq.
Xewerde éytilishiche, xitayni rusiyening su menbeliri bilen teminlesh mesilisi hetta rusiyelikler teripidinmu otturigha qoyulghan bolup, ilgiri rusiye yéza igilik ministiri aléksandir tkachyow rusiyening altay ölkisidin Uyghur aptonom rayonini 70 milyon kubmétir su bilen teminlesh, hetta buni bir milyard kubmétirghiche yetküzüsh idiyisini otturigha qoyghan iken.
Rusiye xewerliridin melum bolushiche, xitay bayqal kölining sayahetchilik we su ishlirigha meblegh sélishqa kirishken bolup, hetta xitay bayqal kölide su chekkilep butulkilargha qachilash bilen shughullinidighan 4 zawut qurushqa tutush qilghan. Emma bu, mezkur rayondiki buryat millitining, buryatiye jumhuriyiti ahalisining naraziliqigha uchrighan bolup, buryat muhit qoghdighuchiliri xitay zawutlirining bayqal kölining ékologiyisige buzghunchiliq élip kélishidin endishe qiliwatqanliqlirini bildürgen.