Уйғур райони даирилири районда су йетишмәслик, екологийәлик бузулуш еғирлаватқанлиқини билдүрди

Уйғур аптоном райони даирилири районида қурғақчилиқ, тупрақниң шорлишиши, су йетишмәслик, су билән тәминләш бесими вә екологийәлик муһитниң бузулуши еғирлишиватқанлиқини агаһландурған.

Буни уйғур аптоном райониниң рәиси шөһрәт закир 26‏-май чақирилған аптоном районниң су байлиқини башқуруш хизмәт гурупписиниң йиғинида оттуриға қойған. Йиғинда шөһрәт закир һөкүмәтниң су байлиқини башқуруш түзүмини қаттиқ иҗра қилишни тәләп қилған.

“тәңритағ тори” ниң хәвәр қилишичә, шөһрәт закир, “су байлиқини қаттиқ башқуруш-башқурмаслиқ, үнүмлүк ишлитиш-ишләтмәслик, қоғдаш-қоғдимаслиқ вә мувапиқ орунлаштуруш-орунлаштурмаслиқ шинҗаң иқтисадиниң давамлиқ тәрәққияти вә муһитни қоғдашқа мунасивәтлик мәсилә” дегән.

Әмма муһит қоғдиғучилар вә иқтисадшунаслар уйғур райониниң су мәсилиси қандақ башқуруштики мәсилә әмәсликини, су мәсилисини хитайниң шәһәрлишиш, көчмәнләр нопуси вә санаәт базилирини қуруш пилани еғирлаштуруветип барғанлиқини илгири сүрүп кәлди.

Америкида олтурушлуқ хитай иқтисадшунас хе чиңлйәнниң қаришичә, уйғур райониниң тәбиий шәрт-шараити чоң типлиқ пахта тоқумичилиқ фабрикилирини қурушқа, бир қанчә милйон нопуслуқ чоң шәһәрләрни бәрпа қилишқа мувапиқ кәлмәйду. У, буниң районда еғир муһит вәйранчилиқини пәйда қилидиғанлиқини агаһландуруп кәлгән.

Әмма шөһрәт закир йиғинда, “ адәм билән тәбиәтниң мунасивитини яхши бир тәрәп қилип районда су байлиқиниң изчиллиқини сақлаш, иқтисадниң нисбәтән тез һәм муқим тәрәққиятиға капаләтлик қилиш” ни тәкитлигән.