Uyghur rayoni da'iriliri rayonda su yétishmeslik, ékologiyelik buzulush éghirlawatqanliqini bildürdi

Muxbirimiz erkin
2016-05-27
Élxet
Pikir
Share
Print

Uyghur aptonom rayoni da'iriliri rayonida qurghaqchiliq, tupraqning shorlishishi, su yétishmeslik, su bilen teminlesh bésimi we ékologiyelik muhitning buzulushi éghirlishiwatqanliqini agahlandurghan.

Buni Uyghur aptonom rayonining re'isi shöhret zakir 26‏-may chaqirilghan aptonom rayonning su bayliqini bashqurush xizmet guruppisining yighinida otturigha qoyghan. Yighinda shöhret zakir hökümetning su bayliqini bashqurush tüzümini qattiq ijra qilishni telep qilghan.

"Tengritagh tori" ning xewer qilishiche, shöhret zakir, "Su bayliqini qattiq bashqurush-bashqurmasliq, ünümlük ishlitish-ishletmeslik, qoghdash-qoghdimasliq we muwapiq orunlashturush-orunlashturmasliq shinjang iqtisadining dawamliq tereqqiyati we muhitni qoghdashqa munasiwetlik mesile" dégen.

Emma muhit qoghdighuchilar we iqtisadshunaslar Uyghur rayonining su mesilisi qandaq bashqurushtiki mesile emeslikini, su mesilisini xitayning sheherlishish, köchmenler nopusi we sana'et bazilirini qurush pilani éghirlashturuwétip barghanliqini ilgiri sürüp keldi.

Amérikida olturushluq xitay iqtisadshunas xé chinglyenning qarishiche, Uyghur rayonining tebi'iy shert-shara'iti chong tipliq paxta toqumichiliq fabrikilirini qurushqa, bir qanche milyon nopusluq chong sheherlerni berpa qilishqa muwapiq kelmeydu. U, buning rayonda éghir muhit weyranchiliqini peyda qilidighanliqini agahlandurup kelgen.

Emma shöhret zakir yighinda, " Adem bilen tebi'etning munasiwitini yaxshi bir terep qilip rayonda su bayliqining izchilliqini saqlash, iqtisadning nisbeten téz hem muqim tereqqiyatigha kapaletlik qilish" ni tekitligen.

Toluq bet