Хитай мәркизи һөкүмитиниң бир гурупписи уйғур елиниң җәнубидики су мәсилилирини тәкшүрүшкә башлиди

Мухбиримиз үмидвар
2015.10.11
Share on WhatsApp
Share on WhatsApp

Хитай сиясий кеңәш муавин рәиси, хитай компартийәси мәркизи секертариятиниң секретари ду чиңлин башчилиқидики хитай мәркизи һөкүмитиниң бир тәкшүрүш гурупписи мәхсус уйғур елиниң җәнубий қисминиң су мәсилиси, болупму деһқанчилиқ үчүн ишлитидиған сүйини теҗәш әһвалини тәкшүрүш үчүн уйғур елиға келип, паалийитини башлиди.

10-Өктәбир күни бу гуруппа үрүмчидә мәхсус су мәсилиси бойичә аптоном район партком секретари җаң чүншән, аптоном район рәиси шөһрәт закир вә башқилар билән бирликтә сөһбәт йиғини өткүзгәндә ду чиңлин сөз қилип, “җәнубий шинҗаңниң деһқанчилиқ сүйини теҗәш хизмитиниң иҗтимаий муқимлиқни қоғдашниң асаси” икәнликини тәкитлиди.

“шинҗаң гезит”ниң бу һәқтики хәвиридин мәлум болушичә, ду чиңлин башчилиқидики мәркәз тәкшүрүш гурупписи мәхсус уйғур елиниң су байлиқлирини ечиш, пайдилиниш вә башқуруш ишлири, болупму деһқанчилиқ сулири теҗәш әһвалини тәкшүрүш үчүн, байинғолин, ақсу, қизилсу, қәшқәр вә хотән вилайәтлиридә паалийәт қилидикән.

Униңдин башқа йәнә мәзкур гуруппа уйғур елиниң җәнубиға орунлашқан хитай ишләпчиқириш қурулуш армийисиниң 1- 2- 3- вә 14-дивизийәлиридиму тәкшүрүш елип баридикән.

Мәзкур тәкшүрүш гурупписиға хитай дөләт тәрәққият вә ислаһат комитети, су ишлири министирлиқи вә деһқанчилиқ министирлиқиниң әмәлдарлири қатнашқан.
Хитай мәркизий һөкүмитиниң мәхсус уйғур елиниң җәнубиниң су мәсилисини тәкшүрүши диққәтни тартти.

Мәлумки, су мәсилиси узундин буян уйғур елидики муһим мәсилә. Болупму, җәнуб уйғур елидики қәшқәр хотән қатарлиқ вилайәтләрдики муһим мәсилә болуп, уйғурлар хитай ишләпчиқириш қурулуш армийисиниң су мәнбәлирини контрол қилип, өзлири униңдин үнүмлүк пайдилиниватқанлиқи әмма, уйғур деһқанлириниң су еһтияҗиниң һәл болмайватқанлиқини шикайәт қилмақта. Униңдин башқа йәнә қалаймиқан ечиш түпәйлидинму тоғрақлиқларниң қуруғанлиқи вә башқа көплигән екологийилик мәсилиләрниң келип чиққанлиқи оттуриға қоюлмақта.

Көп көрүлгән хәвәрләр
Қисқа хәвәрләр
Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.