Xitay merkizi hökümitining bir guruppisi Uyghur élining jenubidiki su mesililirini tekshürüshke bashlidi

Muxbirimiz ümidwar
2015.10.11
Share on WhatsApp
Share on WhatsApp

Xitay siyasiy kéngesh mu'awin re'isi, xitay kompartiyesi merkizi sékértariyatining sékrétari du chinglin bashchiliqidiki xitay merkizi hökümitining bir tekshürüsh guruppisi mexsus Uyghur élining jenubiy qismining su mesilisi, bolupmu déhqanchiliq üchün ishlitidighan süyini téjesh ehwalini tekshürüsh üchün Uyghur éligha kélip, pa'aliyitini bashlidi.

10-Öktebir küni bu guruppa ürümchide mexsus su mesilisi boyiche aptonom rayon partkom sékrétari jang chünshen, aptonom rayon re'isi shöhret zakir we bashqilar bilen birlikte söhbet yighini ötküzgende du chinglin söz qilip, “Jenubiy shinjangning déhqanchiliq süyini téjesh xizmitining ijtima'iy muqimliqni qoghdashning asasi” ikenlikini tekitlidi.

“Shinjang gézit”ning bu heqtiki xewiridin melum bolushiche, du chinglin bashchiliqidiki merkez tekshürüsh guruppisi mexsus Uyghur élining su bayliqlirini échish, paydilinish we bashqurush ishliri, bolupmu déhqanchiliq suliri téjesh ehwalini tekshürüsh üchün, bayin'gholin, aqsu, qizilsu, qeshqer we xoten wilayetliride pa'aliyet qilidiken.

Uningdin bashqa yene mezkur guruppa Uyghur élining jenubigha orunlashqan xitay ishlepchiqirish qurulush armiyisining 1- 2- 3- we 14-diwiziyeliridimu tekshürüsh élip baridiken.

Mezkur tekshürüsh guruppisigha xitay dölet tereqqiyat we islahat komitéti, su ishliri ministirliqi we déhqanchiliq ministirliqining emeldarliri qatnashqan.
Xitay merkiziy hökümitining mexsus Uyghur élining jenubining su mesilisini tekshürüshi diqqetni tartti.

Melumki, su mesilisi uzundin buyan Uyghur élidiki muhim mesile. Bolupmu, jenub Uyghur élidiki qeshqer xoten qatarliq wilayetlerdiki muhim mesile bolup, Uyghurlar xitay ishlepchiqirish qurulush armiyisining su menbelirini kontrol qilip, özliri uningdin ünümlük paydiliniwatqanliqi emma, Uyghur déhqanlirining su éhtiyajining hel bolmaywatqanliqini shikayet qilmaqta. Uningdin bashqa yene qalaymiqan échish tüpeylidinmu toghraqliqlarning qurughanliqi we bashqa köpligen ékologiyilik mesililerning kélip chiqqanliqi otturigha qoyulmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.