Ярлузаңбу дәрясиниң сүйидики лай-патқақлар һиндистанниң гуманини йәниму күчәйткән

Мухбиримиз ирадә
2017-11-30
Share

Хитайниң тибәттин башлинип, һендистанға еқип киридиған хәлқаралиқ дәря-еқинларни тосуп, су амбири ясаватқан болуши еһтималлиқи һиндистан тәрәпниң күчлүк диққитини қозғимақта.

"һиндистан хәвәрлири" гезитиниң чаршәнбә күнидики хәвиридин қариғанда, һиндистанниң хитай билән чегрилинидиған аруначал парадеш штатидики парламент әзаси ниноң ирең һиндистан баш министири модеға мәхсус мәктуп йоллап, тибәт территорийәсидики ярлузаңбу дәрясиниң мәлум сәвәбләр билән еғир дәриҗидә булғанғанлиқини билдүргән.

Униң әскәртишичә, тибәтләр "ярлузаңбу", һиндистанлиқлар "сияң" дәп атайдиған бу дәряниң сүйи ноябир айлирида әйнәктәк сүзүк ақидикән. Һалбуки, йеқиндин буян бу дәряниң сүйи нормалсиз дәриҗидә лай-патқақлар билән булғанған. Униң тибәттики баш еқимидин һәтта семонт парчилириму еқип келишкә башлиған. Бу әһваллар хитайниң мәзкур хәлқаралиқ дәряниң баш еқинида амбар яки тонел қезип, дәря сүйини башқа тәрәпкә башлашқа урунуватқан болуши мумкинликидин бешарәт бәргән вә һиндистан тәрәпниң бу һәқтики гуманларни күчәйткән.

Өткән айда "җәнубий хитай әтигәнлик гезити" хитайниң брахмапотра дәрясиниң тибәт территорийисидики баш еқимини тосуп су амбири ясимақчи болғанлиқи, у йәрдин 1000 километир узунлуқтики тонил арқилиқ бу суни уйғур дияридики тәклимакан чөллүкигә башлимақчи болуватқанлиқини хәвәр қилған иди. Әмма әтиси, хитай ташқи ишлар баянатчиси хуа чүнйиң мухбирларниң бу һәқтики соаллириға җаваб берип, "бу сахта хәвәр, тоғра әмәс" дәп хәвәрни рәт қилған.

Аруначал парадеш штатиниң парламент әзаси "һиндистан хәвәрлири" гезитигә қилған сөзидә, дәря сүйидики булғинишниң башқа бир ениқлимиси йоқлуқини илгири сүрүп, вәқәни чоқум хәлқара органларниң тәкшүрүп ениқлиши керәкликини әскәрткән. ярлузаңбу яки сияң дәряси брахмапутра дәрясиға қошулидиған әң чоң тармақ еқинларниң бири болуп, у тибәттин башлинип, аруначал парадеш арқилиқ брахмапутра дәрясиға қошулидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт