Хитай тибәтниң сүйини тәклимаканға башлаш қурулуши һәққидики хәвәрни инкар қилди

Мухбиримиз әзиз
2017-10-31
Share

Хитайдики алақидар тармақларниң тибәт егизликидин тәклимаканға су башлаш қурулуши һәққидә һөкүмәткә илтимас сунғанлиқи һәққидики хәвәр 30-өктәбирдә дунядики көплигән ахбарат васитилиридин йәр алған иди. Бүгүн хитай ташқи ишлар министирлиқи бу хәвәрни инкар қилди.

Һиндистанда чиқидиған "һәптә ахиридики рәһбәрләр" гезитиниң хәвиригә қариғанда, хитай ташқи ишлар министирлиқиниң баянатчиси хуа чүнйиң 31-өктәбирдики мухбирларни күтүвелиш йиғинида бу һәқтики соалға җаваб берип, "у пүтүнләй ялған хәвәр. Биз чегра һалқиған бу дәря мәсилисидики һәмкарлиқни муһим дәп қарап кәлмәктимиз" дегән.

Һиндистан һөкүмити бу зор қурулуш һәққидики хәвәр тарқалғанда "браһмапутра дәрясиниң сүйи боғуп ташланса һиндистанниң шималий қисим өлкилиригә ғайәт зор сәлбий тәсир елип келиду" дегән болса, уйғур тәшкилатлар буниң уйғурлар дияриға хитай өлкилиридин милйонлиған көчмән йөткәшкә шараит һазирлайдиғанлиқини тәкитлигән иди.

Мәлум болушичә, бу зор қурулуш һәққидики илтимасниң тәстиқлиниши 2018-йили мартта мәлум болиду, дәп қаралған иди. Униңда тибәт егизликидә ярлузаңбу (браһмапутра) дәрясини тосуп, униң сүйини 1000 километирлиқ тонел арқилиқ тәклимаканға тошуш ахирқи нишан қилинған. Мутәхәссисләр бу қурулушқа аз дегәндиму 150 милярд америка доллири кетидиғанлиқини тәкитлигән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт