«Ш у а р» қурулғанлиқиниң 65 йиллиқини тәбрикләш сөһбәт йиғинида «уйғур» нами ишлитилмигән

Мухбиримиз җәвлан
2020-10-07
Елхәт
Пикир
Share
Принт

Хитайдики «соху» ториниң йеқинда бәргән хәвиригә қариғанда, хитай һөкүмити 3-өктәбир уйғур аптоном райони қурулғанлиқиниң 65 йиллиқи мунасивити билән үрүмчидики хәлқ сарийида сөһбәт йиғини өткүзгән.

Хәвәрдә ейтилишичә, бу йиғинға уйғур аптоном районлуқ партком вә биңтуән парткоминиң секретари чин чүәнго қатнашқан вә сөз қилған. Хитай мәмликәтлик хәлқ қурултийи даим комитетиниң сабиқ муавин башлиқи исмаил тиливалди, хитай мәмликәтлик сиясий кеңәшниң сабиқ муавин рәиси абләт абдурешит қатарлиқлар қатнашқан. Уйғур аптоном районлуқ һөкүмәтниң рәиси шөһрәт закир йиғинға риясәтчилик қилған.

Йиғинда чен чүәнго уйғур районидики һәр милләт хәлқиниң 65 йилдин буян хитай компартийәсиниң рәһбәрликидә тиришип алға игириләп, конилиқтин йеңилиққа, намратлиқтин баяшатлиққа, бөлгүнчиликтин иттипақлиққа өткәнликидәк аталмиш «парлақ нәтиҗиләр» ни сөзләп өткән. Андин у компартийәниң шинҗаң сияситиниң изчил тоғра болуп келиватқанлиқини, болупму хитай компартийәсиниң баш секретари ши җинпиң һоқуқ тутқандин кейин ачқан икки қетимлиқ «шинҗаң хизмәт йиғини» дин кейин уйғур аптонм районида мисли көрүлмигән тинчлиқ вә тәрәққият вәзийити барлиққа кәлгәнликини тәкитлигән.

«Соху» тори қатарлиқ хитайниң көплигән торлирида уйғур аптоном райониниң нами «аптоном район» дәпла елинған болуп, «уйғур» дегән сөз чиқириветилгән. Көзәткүчиләрниң қаришичә, хитай таратқулирида бу хил әһвал илгириму көрүлгән болсиму, лекин йеқинқи мәзгилләрдә барғанчә омумлишип бармақтикән. Буниңдин хитай һөкүмитиниң «уйғур аптоном райони» дики «уйғур» дегән милләт уқумини барғанчә суслаштуруш вә йоқитиш нийитини көрүвалғили болидикән. Бу өз нөвитидә йәнә ши җинпиңниң «2-әвлад милләтләр сиясити» ниң иҗра қилиниши болуп, бу сиясәттә милләт уқумини тәкитлимәслик, миллий алаһидиликни йоқитиш вә ассимилятсийә қилиш нишан қилинған.

Пикирләр (0)
Share
Толуқ бәт