Xitayning xoten sheher ichidiki "Sultanim" mazarliqini yötkiwetkenliki ashkarilandi

Muxbirimiz erkin
2019-05-31
Share

Nöwette, xitay hökümiti Uyghur rayonida yerlik xelqlerning mazar we qebrilirini keng kölemlik chéqish yaki yötkesh herikiti élip barmaqta.

Xoten shehirining alaqidar hökümet tarmaqliri yéqinda xoten shehiridiki sultanim mazarliqini yötkesh heqqide uqturush chüshürüp, méyit igilirining belgilen'gen möhlet ichide derhal qebre yötkesh resmiyetlirini béjirishini telep qilghan. Sultanim maziri 19‏-otturilirida, yaqupbeg dewrning sel aldidiki xoten hökümdari bebibullaxan zamanida peyda bolghan bolup, burun bu mazargha mexsus xotendiki mufti, qazi, ölüma we jama'et erbabliri depne qilinip kelgen tarixiy mazarliq idi.

Xitayning "Sheher muhitini güzelleshtürüsh," qebre bashqurushni "Qéliplashturush" namida élip bériliwatqan mazar we qebristanliqlarni yötkesh, chéqish herikiti Uyghur kishilik hoquq teshkilatlirining tenqidige uchrap keldi. Ularning ilgiri sürüshiche, xitayning Uyghur aptonom rayoni miqyasida élip bériliwatqan mazar we qebre chéqish, yötkesh herikiti nöwette qanat yayduruluwatqan "Xitaylashturush" siyasitining bir qismi bolup, u Uyghurlarning tarix, örp-adet we diniy simwollirini ulardin yiraqlashturushni meqset qilghaniken.

Xoten sheherlik diniy ishlar idarisi we xoten sheherlik qebre köchürüsh ishxanisining uqturushida, sultanim mazarliqigha depne qilin'ghan méyitlarning xoten nahiyesidiki imam musakazimgha yötkilidighanliqi, shunga, "Bu mazarliqqa méyit qoyghan sheher ahalilirining 20‏-martqiche sultanim mazarliqini tizimlash ornigha kélip tizimgha aldurushi telep qilin'ghan".

Uqturushta yene, eger waqtida kélip tizimlash resmiyiti béjirilmise, qebrining igisiz méyit süpitide bir terep qilinidighanliqi, buningdin kélip chiqqan barliq aqiwetlerge méyit igisining mes'ul bolidighanliqi tekitlen'gen. Xitay hökümiti mazar we qebristanliqlarni keng kölemlik chéqish we yötkesh herikiti qozghashning aldida mazar we qebrilerdiki ayet, gümbez, ay yultuzluq belgilerni "Radikalliqning ipadisi" dégen seweb bilen birdek élip tashlighan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet