Xitay hökümet taratquliri 5 yashliq omranning dunyani lerzige salghan sin körünüshini "Saxta qurashturulghan xewer" dep ighwa tarqatqan

Muxbirimiz qutlan
2016-08-22
Élxet
Pikir
Share
Print

Xitay merkiziy téléwiziyesi süriyediki bombardimanda qutquzuwélin'ghan 5 yashliq omranning sin xewiri "Gumanliq" dep ighwa tarqitip, uni "Gherbning teshwiqat urushi" diki bir saxta körünüsh, dégen.

Melumki, 17-awghust küni süriyening helep shehiridiki shiddetlik bombardimanda yarilan'ghan 5 yashliq bala omranning bichare haliti dunyawi taratqularda körsitilip, milyonlighan insanlarning yürek-baghrini ezgen idi. Shu küni amérika dölet ishliri ministirliqi bu heqte inkas qayturup, omranni süriye urushining "Heqiqiy yüzi" dégen idi.

Halbuki, xitay merkiziy téléwiziyesi pütün dunya taratqulirida qiziq nuqta bolghan 5 yashliq omranning hékayisini "Gumanliq", uningdiki sin körünüshining "Saxta we yasalghan bolushi éhtémalgha yéqin" dégen.

Xitayning bu heqtiki xewiride yene "Neq meydandiki ishchilar aldi bilen balini qutquzush üchün jiddiy heriket qilmay, eksiche kaméragha élishqa aldirighan" déyilgen.

Melumki, xitay öz ittipaqdishi rusiye bilen birlikte süriyediki besher esed hökümitini qollawatqan bolup, közetküchiler, rusiye bilen xitayning heleptiki islamiy guruppilar kontrol qiliwatqan rayonlarni bombardiman qilghanliqini ilgiri sürmekte.

Xitay hökümet taratqulirining 5 yashliq omran heqqidiki xewerlerni yoqqa chiqirishi ularning gherb taratquliri bilen süriye mesiliside küch sinishiwatqanliqini ashkarilimaqta.

Toluq bet