Xitay da'iriliri muhajirettiki Uyghur sha'iri tahir hamutning uruq-tughqanlirini tutqun qilghan

Muxbirimiz erkin
2018-03-30
Élxet
Pikir
Share
Print

Amérikida chiqidighan "Wol-strét zhurnili" géziti jüme küni maqale élan qilip, xitay da'irilirining amérikida turushluq Uyghur serxillirining wetendiki a'ile-tawabi'atlirini we uruq-tughqanlirini tutqun qiliwatqanliqi we bu arqiliq ularning chet'ellerdiki pa'aliyitini kontrol qilishqa urunuwatqanliqini bildürgen.

Maqalide amérikida turushluq nopuzluq Uyghur sha'iri tahir hamutning wetendiki uruq-tughqanlirining tutqun qilin'ghanliqi xewer qilin'ghan. Tahir hamut ötken yili "Wol-strét zhurnili" gézitining ziyaritini qobul qilip, xitayning Uyghur rayonidiki siyasitini tenqid qilghan idi. Mezkur gézitning jüme küni élan qilghan xewiride körsitilishiche, ötken yili 12‏-ayning axirlirida tahir hamutning wetendiki bir inisi iz-déreksiz ghayib bolghan.Uning yene ikki ayal tughqini xitay saqchiliri teripidin chaqirtilip soraq qilin'ghan. Xewerde tahir hamutning sözi neqil keltürülüp, xitay da'irilirining "Uning xitaygha qaytip kelmigenliki we chet'elde bölgünchilik pa'aliyetliri bilen shughullan'ghanliqi" seweblik wetendiki uruq-tughqanlirining teqib astigha élin'ghanliqi bildürgen. Xewerde yene amérikida turushluq yene bir Uyghur ziyaliysi tahir imin heqqide bayanlar bérilip, uning amérikigha a'ilisidikilerni élip kélelmigenliki, özining amérikigha kelgendin kéyin xitay saqchilirining téléfon qilip tehdit sélishigha uchrighanliqi eskertilgen.

Xewerde xitay saqchilirining qolini chet'ellergiche sozup, chet'eldiki Uyghur pa'aliyetchilirini bésiqturushqa urunushtek bu qilmishining amérikigha oxshash gherb döletlirige xiris peyda qiliwatqanliqi bildürgen.

Toluq bet