Президент байден, хитай тәйвәнгә һуҗум қилса, американиң қораллиқ арилишидиғанлиқини билдүрди

Мухбиримиз әркин
2022.09.19
Share on WhatsApp
Share on WhatsApp

Америка президенти җов байден 18-сентәбир тәйвән һәққидә тохтилип, әгәр хитай тәйвәнгә һуҗум қилса, америка армийәсиниң тәйвәнни қораллиқ қоғдайдиғанлиқини билдүргән. Бу, президент байденниң йеқинқи 4 ай ичидә 2-қетим әгәр хитай тәйвәнгә һуҗум қилса американиң қораллиқ арилишидиғанлиқини ейтишидур. У бу йил 5-айда японийәдә зиярәттә болғандиму американиң тәйвәнни қоғдайдиғанлиқини ейтқаниди. Байден 18-сентәбир америка CBS телевизийә қанилиниң “60 минут” намлиқ сөһбәт программисиниң зияритини қобул қилғанда риясәтчиниң тәйвән һуҗумға учриса американиң қоғдайдиған-қоғдимайдиғанлиқи һәқтики соалиға җаваб берип: “мисли көрүлүп бақмиған ашундақ бир һуҗум болуп қалса” американиң тәйвәнни қоғдайдиғанлиқини билдүргән.

Байден риясәтчиниң униң сөзи хитай тәйвәнгә һуҗум қилса америка армийәси украинадин пәрқлиқ һалда, тәйвәнни қоғдайду, дегәнни билдүрәмду? дегән сөзигә қарита “шундақ” дәп җаваб бәргән. Ройтерс агентлиқиниң хәвиридә қәйт қилинишичә, президент байден бурун бу сөзләрни японийәдә ейтқан болсиму, бирақ бу қетим у америка армийәсиниң тәйвәнни қоғдайдиғанлиқини техиму ениқ шәрһлигән. Америка изчил тәйвән мунасивәт қануниға әмәл қилидиғанлиқини ейтип кәлгән болсиму, лекин у һазирқидәк қораллиқ арилишидиғанлиқини ениқ ейтип бақмиғаниди.

Байденниң сөзиниң хитайни қаттиқ биарам қилғанлиқи мәлум. Хитай ташқи ишлар министирлиқи баянатчиси мав ниң дүшәнбә күни байденниң сөзигә инкас қайтуруп, униң сөзи тәйвән бөлгүнчи күчлиригә “җиддий хата сигнал беридиғанлиқи” ни билдүргән.

Униң ейтишичә, хитай байденниң сөзидин “қаттиқ нарази болған һәм униңға қәтий қарши туридикән”.

У йәнә хитайниң бөлгүнчиликкә қарши барлиқ васитиләрни қоллиниш һоқуқини сақлап қалидиғанлиқини ейтқан. Лекин ройтерс агентлиқиниң ейтишичә, тәйвән ташқи ишлар министирлиқи президент байденға “америка һөкүмитиниң тәйвәнни қоғдаш тоғрисидики полаттәк вәдиси” ни қайта тәкитлигәнлики үчүн рәһмәт ейтқан.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.