Prézidént baydén, xitay teywen'ge hujum qilsa, amérikaning qoralliq arilishidighanliqini bildürdi

Muxbirimiz erkin
2022.09.19
Share on WhatsApp
Share on WhatsApp

Amérika prézidénti jow baydén 18-séntebir teywen heqqide toxtilip, eger xitay teywen'ge hujum qilsa, amérika armiyesining teywenni qoralliq qoghdaydighanliqini bildürgen. Bu, prézidént baydénning yéqinqi 4 ay ichide 2-qétim eger xitay teywen'ge hujum qilsa amérikaning qoralliq arilishidighanliqini éytishidur. U bu yil 5-ayda yaponiyede ziyarette bolghandimu amérikaning teywenni qoghdaydighanliqini éytqanidi. Baydén 18-séntebir amérika CBS téléwiziye qanilining “60 Minut” namliq söhbet programmisining ziyaritini qobul qilghanda riyasetchining teywen hujumgha uchrisa amérikaning qoghdaydighan-qoghdimaydighanliqi heqtiki so'aligha jawab bérip: “Misli körülüp baqmighan ashundaq bir hujum bolup qalsa” amérikaning teywenni qoghdaydighanliqini bildürgen.

Baydén riyasetchining uning sözi xitay teywen'ge hujum qilsa amérika armiyesi ukra'inadin perqliq halda, teywenni qoghdaydu, dégenni bildüremdu? dégen sözige qarita “Shundaq” dep jawab bergen. Roytérs agéntliqining xewiride qeyt qilinishiche, prézidént baydén burun bu sözlerni yaponiyede éytqan bolsimu, biraq bu qétim u amérika armiyesining teywenni qoghdaydighanliqini téximu éniq sherhligen. Amérika izchil teywen munasiwet qanunigha emel qilidighanliqini éytip kelgen bolsimu, lékin u hazirqidek qoralliq arilishidighanliqini éniq éytip baqmighanidi.

Baydénning sözining xitayni qattiq bi'aram qilghanliqi melum. Xitay tashqi ishlar ministirliqi bayanatchisi maw ning düshenbe küni baydénning sözige inkas qayturup, uning sözi teywen bölgünchi küchlirige “Jiddiy xata signal béridighanliqi” ni bildürgen.

Uning éytishiche, xitay baydénning sözidin “Qattiq narazi bolghan hem uninggha qet'iy qarshi turidiken”.

U yene xitayning bölgünchilikke qarshi barliq wasitilerni qollinish hoquqini saqlap qalidighanliqini éytqan. Lékin roytérs agéntliqining éytishiche, teywen tashqi ishlar ministirliqi prézidént baydén'gha “Amérika hökümitining teywenni qoghdash toghrisidiki polattek wedisi” ni qayta tekitligenliki üchün rehmet éytqan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.