Таҗикистан президенти емам әли рахман“милләт даһийси” дегән намға еришти

Мухбиримиз үмидвар
2015.12.27


Таҗикистан һөкүмити 25 - декабр күни президент емам әли рахманниң “тинчлиқ вә миллий бирликниң асасини салғучи - милләт даһийси” ға аит бир қанунни имзалиғанлиқини билдүргән.

“азадлиқ” радиосиниң хәвәр қилишичә, буниңдин бир һәптә илгири таҗикистан миллий мәҗлиси таҗикистан президенти емам әли рахманни “милләт даһийси” дәп аташ һәққидики қанунни мақуллиған болуп, таҗикистан парламенти рәиси шүкүрҗан зухуров емам әли рахманни “таҗик хәлқи үчүн көп иш қилған қәһриман” дәп атиған.

Емам әли рахманға “милләт даһийси” дегән салаһийәтни бериш мәсилиси 8 ай илгири оттуриға қоюлған болуп, мана әмди парламент тәрипидин қануни күчкә игә қилинған.

“явроасия хәвәрлири” ториниң йезишичә, емам әли рахман бу қанун имзалиниш билән таҗикистанниң мәңгүлүк “милләт даһийси” болған.

63 яшлиқ емам әли рахман 1992 - йидин буян таҗикистанни идарә қилматқа. У, 2013 - йили йәнә би қетим президентлиққа сайланған.

Еман әли рахманниң “милләт даһийси” дәп атилиши мәсилисигә қарита өктичиләр наразилиқ пикирини ипадилигән болуп, улар буни униң йәнә бир қетимлиқ демократийигә қарши қилмиши дәп тәнқид қилған.

Емам әли рахман оттура асияда иккинчи қетим “милләт даһийси” салаһийитигә еришкән президент болуп, бәш йил илгири қазақистан президенти нурсултан назарбайефму әнә шундақ салаһийәткә игә болған иди.

“азадлиқ”ниң йезишичә, назарбайеф билән рахманниң пәрқи шуки, назарбайеф қазақистан парламенти тәстиқлиған“милләт даһийси” ға аит қанунни өзи имзалимиған болуп, буни баш министир вә парламент юқири палата рәиси имзалиған. Бирақ, таҗикистан парламенти тәстиқлиған бу қанунни еман әли рахман өзи имзалиған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.