Tajikistan prézidénti émam eli raxman"Millet dahiysi" dégen namgha érishti

Muxbirimiz ümidwar
2015-12-27
Share


Tajikistan hökümiti 25 - dékabr küni prézidént émam eli raxmanning "Tinchliq we milliy birlikning asasini salghuchi - millet dahiysi" gha a'it bir qanunni imzalighanliqini bildürgen.

"Azadliq" radi'osining xewer qilishiche, buningdin bir hepte ilgiri tajikistan milliy mejlisi tajikistan prézidénti émam eli raxmanni "Millet dahiysi" dep atash heqqidiki qanunni maqullighan bolup, tajikistan parlaménti re'isi shükürjan zuxurow émam eli raxmanni "Tajik xelqi üchün köp ish qilghan qehriman" dep atighan.

Émam eli raxman'gha "Millet dahiysi" dégen salahiyetni bérish mesilisi 8 ay ilgiri otturigha qoyulghan bolup, mana emdi parlamént teripidin qanuni küchke ige qilin'ghan.

"Yawro'asiya xewerliri" torining yézishiche, émam eli raxman bu qanun imzalinish bilen tajikistanning menggülük "Millet dahiysi" bolghan.

63 Yashliq émam eli raxman 1992 - yidin buyan tajikistanni idare qilmatqa. U, 2013 - yili yene bi qétim prézidéntliqqa saylan'ghan.

Éman eli raxmanning "Millet dahiysi" dep atilishi mesilisige qarita öktichiler naraziliq pikirini ipadiligen bolup, ular buni uning yene bir qétimliq démokratiyige qarshi qilmishi dep tenqid qilghan.

Émam eli raxman ottura asiyada ikkinchi qétim "Millet dahiysi" salahiyitige érishken prézidént bolup, besh yil ilgiri qazaqistan prézidénti nursultan nazarbayéfmu ene shundaq salahiyetke ige bolghan idi.

"Azadliq"ning yézishiche, nazarbayéf bilen raxmanning perqi shuki, nazarbayéf qazaqistan parlaménti testiqlighan"Millet dahiysi" gha a'it qanunni özi imzalimighan bolup, buni bash ministir we parlamént yuqiri palata re'isi imzalighan. Biraq, tajikistan parlaménti testiqlighan bu qanunni éman eli raxman özi imzalighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet