Tajikistan rogun su éléktr istansisi qurulushini bashlidi

Tajikistan rogun su éléktr istansisi qurulushini resmiy bashlighan. Mezkur éléktr istansisining dambisi, yeni, su tosmisining égizliki 335 métir kélidighan bolup, bu, xitayning “Jinping-1”su éléktr istansisi dambisidin 30 métir égiz hésablinidiken. Bu qurulush Uyghur diyari tutishidighan pamir égizlikidiki tagh jilghisidin éqip ötidigha waxsh deryasida yasilidiken.

Rogun su éléktr istansisi qurulushi pilani aldi bilen özbékistanning qattiq naraziliqi we qarshiliqigha uchrighan bolup, chünki özbékistan terep tajikistanning amu deryasining bash qismidiki su menbelirini boghup, damba yasash arqiliq özbékistanning su bilen teminlinishini qamal qilishidin endishe qilghan.

B b s agéntliqining xewer qilishiche, köp yillardin buyan türlük talash-tartishlarni qozghap kelgen rogun éléktr istansisi qurulushi özbékistan prézidénti islam kerimofning ölümidin kéyin resmiy bashlan'ghan bolup, bu qurulush üchün 3 milyard 900 milyon dollar serp qilinidiken.

Ötken yili yazda italiye shirkiti “Saline impériglo” mezkur qurulushqa meblegh sélish salahiyitige érishken. Metbu'at inkasliridin melum bolushiche, rusiyemu rogun éléktr istansisi qurulushini qollighuchi döletlerning biridur.

Eger mezkur su éléktr istansisi qurulushi pütse, tajikistan özini éléktr énérgiyisi bilen toluq teminligendin tashqiri yene öz éléktr énérgiyilirini afghanistan we pakistan'gha éksport qilish imkaniyitige ige bolidiken. Melum bolushiche, tajikistanning rogun su éléktr istansisi qurulushi pilani 40 yil ilgiri otturigha chiqqan bolup sowét ittipaqining yimirilishi we tajikistanning iqtisadi küchining ajizliqi bilen emelge ashmay kelgen idi.