Tajikistan 903 adem üstidin xelq'araliq turush buyruqi chiqarghan
2016.01.26
Tajikistan bixeterlik da'iriliri 200 din artuq ademni tutqun qilghan bolup, ularni tajikistanda siyasiy özgirish qozghash pilanigha qatnashqan dep guman qilin'ghan. Perghane uchur torining xewerliride körsitilishiche, tajikistan ichki ishlar ministiri ramizan reximzadening 25-yanwar küni ashkarilishiche, bu ademler ötken yili 9-aydiki siyasi özgirish qilishqa urunush bilen munasiwetlik bolup, ularning 11 nepiri özlirini melum qilghanlar iken.
Tajikistanning “Asiya pilus” agéntliqining yézishiche, mezkur tutqun qilin'ghanlar üstidin jinayi délo turghuzulup, ularning matériyalliri tajikistan aliy sotigha yollap bérilgen.
Xewerlerdin melum bolushiche ötken yili 9-ayning bashlirida tajikistan mu'awin dölet mudapi'e ministiri abduxelim nazarzade siyasiy özgirish qozghashqa urun'ghan bolsimu netije qazinalmighan idi. Uning qoralliq guruppisi yoshurunuwalghan idi. Hökümet küchliri herbiy heriket jeryanida 38 neper nazarzade egeshküchisini yoqatqanliqini xewer qilghan idi.
Tajikistan ichki ishlar ministiri rehimzade tajikistan hökümitining 903 neper tajikistanliq üstidin xelq'araliq tutush buyruqi chiqarghanliqi we ularni esebiylik, térrorluq teshkilati uyushturush qatarliq ishlarda eyibligenlikini bildürgen.
Uning éytishiche, 2015-yili tajikistan jumhuriyitide 835 térrorluqqa alaqidar jinayet qilmishi pash qilin'ghan bolup, 247 ademge resmiy jinayet turghuzulghan.
Ottura asiya uchur wasitilirining xewerliride körsitilishiche, ötken yili 9-ayda tajikistan hökümiti tajikistanda yüz bergen siyasiy özgirish qilishqa urunush herikitini, tajikistan islam güllinish partiyesige baghlighan bolup, hökümet bu teshkilatni térrorluq teshkilati dep atighan idi.
Mezkur weqe we bu weqening jawabkarliqi zimmisige artilghan abduxelim nazarzade tajikistan jumhuriyitining mu'awin dölet mudapi'e ministirliq wezipisini atqurghan bolup, mezkur weqe hem mezkur shexs heqqide bir mehel köp uchurlar otturigha chiqqan idi.
Tajikistanda sowét ittipaqi yimirilgendin kéyin bir qétim keng kölemde ichki urush, yeni islami guruppa bilen hakimiyet arisida urush partlap köp adem ölgen we köp adem rusiye hem bashqa qoshna ellerge musapir bolghan idi. Prézidént émam éli raxman uzun yillardin buyan tajikistanni idare qilmaqta.