Хитайниң қошунлириниң таҗикистандики һәрбий базиси арқилиқ вахан каридорини йеқиндин көзәтмәктикән

Мухбиримиз ирадә
2019-02-19
Елхәт
Пикир
Share
Принт

«Вашингтон почтиси» гезити хитайниң таҗикистандики һәрбий паалийәтлири һәққидә мәхсус хәвәр тарқатти. «Хитай қошунлири афғанистанниң босуғисиға орунлашти» мавзулуқ хәвәрдә көрситилишичә, хитайниң һәрбий қошунлири таҗикистанниң вахан каридоридин бир қанчә инглиз мили йирақлиқтики мурғап районида база қурған.

Мухбири таҗикистанға қилған биваситә зиярити, елип берилған сөһбәт вә сүний һәмраһидин тартилған сүрәтләрни анализ қилиш арқилиқ районда хитайниң һәрбий базисиға тәвә болған алаһазәл 20 дин ошуқ бина вә көзитиш мунарлири барлиқини, уларниң бу йәрдә аз дегәндә 3 йилдин буян һәрикәт қиливатқанлиқини илгири сүргән.

«Вашингтон почтиси» мухбири җеррий шиһниң хәвәрдә баян қилишичә, улар юқиридикидәк һәрбий биналардин бирни көргән шундақла бу һәрбий базиға йеқин җайдики базарда сода-сетиқ қиливатқан хитай әскәрләрниму көргән. Диққәт қозғайдиғини, әскәрләрниң һәрбий кийиминиң яқисидики бәлгиси хитай армийәсиниң уйғур елидә турушлуқ қисимлириға аит икән. Уларниң арисидики ма фамилилиқ бири өзлириниң бу җайға кәлгинигә 3-4 йил болғанлиқини ейтқан. Мухбир улардин: «һазирғичә афғанистан чеграсидин өтмәкчи болған бирәрини қолға чүшүрүп бақтиңларму?» дәп сориған, бирақ улар бундақ мәлуматларни ейтишқа болмайдиғанлиқини ейтип җаваб беришни рәт қилған.

Хәвәрдә ейтилишичә, хитай ташқи ишлар министирлиқи бу һәқтики соалға җаваб бәрмигән. Таҗикистан ташқи ишлар министирлиқи болса язма баянат арқилиқ җаваб қайтуруп, «хитайниң таҗикистанда бир һәрбий базиси йоқ, бу һәқтә бир учришишларму болуп бақмиди» дегән.

Һалбуки, «хәлқара кризис гурупписи» намлиқ мустәқил хәлқара истратегийә оргиниму 2018-йилиниң бешида елан қилған бир доклатида, хитай аманлиқ күчлириниң таҗикистанниң вахан каридориға чегридаш җайида һәрбий әслиһә базиси қурғанлиқини билдүргән иди.

Хитай һөкүмити аталмиш уйғур қораллиқлириниң һуҗум қилиш хәвпини илгири сүрүп кәлгән болғачқа хитайниң вахан каридориға йеқин җайлардики һәрбий паалийәтлириму уйғур елидики бихәтәрлик әндишилири билән мунасивәтлик дәп пәрәз қилинмақта.

Пикирләр (0)
Share
Толуқ бәт