Xitayning qoshunlirining tajikistandiki herbiy bazisi arqiliq waxan karidorini yéqindin közetmektiken

Muxbirimiz irade
2019-02-19
Élxet
Pikir
Share
Print

"Washin'gton pochtisi" géziti xitayning tajikistandiki herbiy pa'aliyetliri heqqide mexsus xewer tarqatti. "Xitay qoshunliri afghanistanning bosughisigha orunlashti" mawzuluq xewerde körsitilishiche, xitayning herbiy qoshunliri tajikistanning waxan karidoridin bir qanche in'gliz mili yiraqliqtiki murghap rayonida baza qurghan.

Muxbiri tajikistan'gha qilghan biwasite ziyariti, élip bérilghan söhbet we sün'iy hemrahidin tartilghan süretlerni analiz qilish arqiliq rayonda xitayning herbiy bazisigha tewe bolghan alahazel 20 din oshuq bina we közitish munarliri barliqini, ularning bu yerde az dégende 3 yildin buyan heriket qiliwatqanliqini ilgiri sürgen.

"Washin'gton pochtisi" muxbiri jérriy shihning xewerde bayan qilishiche, ular yuqiridikidek herbiy binalardin birni körgen shundaqla bu herbiy bazigha yéqin jaydiki bazarda soda-sétiq qiliwatqan xitay eskerlernimu körgen. Diqqet qozghaydighini, eskerlerning herbiy kiyimining yaqisidiki belgisi xitay armiyesining Uyghur élide turushluq qisimlirigha a'it iken. Ularning arisidiki ma famililiq biri özlirining bu jaygha kelginige 3-4 yil bolghanliqini éytqan. Muxbir ulardin: "Hazirghiche afghanistan chégrasidin ötmekchi bolghan birerini qolgha chüshürüp baqtinglarmu?" dep sorighan, biraq ular bundaq melumatlarni éytishqa bolmaydighanliqini éytip jawab bérishni ret qilghan.

Xewerde éytilishiche, xitay tashqi ishlar ministirliqi bu heqtiki so'algha jawab bermigen. Tajikistan tashqi ishlar ministirliqi bolsa yazma bayanat arqiliq jawab qayturup, "Xitayning tajikistanda bir herbiy bazisi yoq, bu heqte bir uchrishishlarmu bolup baqmidi" dégen.

Halbuki, "Xelq'ara krizis guruppisi" namliq musteqil xelq'ara istratégiye orginimu 2018-yilining béshida élan qilghan bir doklatida, xitay amanliq küchlirining tajikistanning waxan karidorigha chégridash jayida herbiy eslihe bazisi qurghanliqini bildürgen idi.

Xitay hökümiti atalmish Uyghur qoralliqlirining hujum qilish xewpini ilgiri sürüp kelgen bolghachqa xitayning waxan karidorigha yéqin jaylardiki herbiy pa'aliyetlirimu Uyghur élidiki bixeterlik endishiliri bilen munasiwetlik dep perez qilinmaqta.

Toluq bet