Xitay qurulush shirkiti tajikistanning binakarliq sahesini kontrol qilishqa kirishti

Muxbirimiz ümidwar
2017-02-22
Élxet
Pikir
Share
Print

Xitayning bir qurulush shirkiti tajikistan qurulush shirkitining 70% ke yéqin pay chékini sétiwalghan bolup, mezkur xitay qurulush shirkiti tajikistan'gha 170 milyon dollar meblegh sélish planini otturigha qoyghan shuningdek tajikistanning bir qisim muhim bina qurulushlirini püttürüshni zimmisige alghan.

Azadliq radiyosining xewer qilishiche, tajikistan qurulush saheside üstünlük qazan'ghan xitayning "Jéjyang asiya binakarliq we bézesh shirkiti" tajikistan jumhuriyitining "Tajikistan asiya qurulush shirkiti" bilen tajikistan tupriqida heshemetlik méhmanxanilar, ahaliler turalghu öyliri we bashqa qurulushlarni qilish heqqide kélishim tüzgen bolup, tajikistan shirkitining 67% pay chéki xitay terepke ötken.

Xewerde déyilishiche, mezkur xitay shirkiti tajikistanning meblegh sélish istiqbalining nahayiti muwapiq ikenlikini békitip, bu döletke meblegh sélishni qarar qilghan.

Xitay qurulush shirkitining tajikistanda püttüridighan qurulushliri ichide tajikistan döletlik tiyatirxanimu bar iken. Bulardin bashqa yene, xitay terep döletlik kutupxana, tashqi ishlar ministirliqi we dölet baj idarisi qatarliq orunlarning binalirinimu quridiken.

Tehlilchiler, xitayning tajikistan, qazaqistan, özbékistan we qirghizistan qatarliq ottura asiya döletlirige köplep meblegh sélish arqiliq öz tesir küchini ashuruwatqanliqini otturigha qoyushmaqta.

Yéqinqi yillardin buyan, xitay Uyghur diyari bilen qoshna tajikistan jumhuriyitining éléktr énérgiyesi qurulushliri, yol, köwrük we tonéllarni yasash, zawut-fabrika qurush qatarliq pilanlirini emelge ashurmaqta. Nöwette, tajikistanning tashqi qerzi ikki milyard amérika dolliri bolup, u xitaygha bir milyard dollar qerzge boghulghan iken.

Toluq bet