Хитай таҗикистан үчүн чегра қаравулханиси вә һәрбий мәшиқ орни ясап бериду

Мухбиримиз үмидвар
2016-09-27
Елхәт
Пикир
Share
Принт

Хитай билән таҗикистан һөкүмәтлири таҗикистан тәрәпниң афғанистан билән болған чеграсини қоғдишини мустәһкәмләш үчүн келишим түзүшкә һазирланған.

Азадлиқ радиосиниң хәвәр қилишичә, мәзкур келишим лайиһиси таҗикистан һөкүмити тәрипидин бекитилгән болуп, келишим бойичә, хитай тәрәп таҗикистанниң афғанистан билән болған чегра нуқтисида төт чегра қаравулханиси вә мәшиқ орунлириға игә һәрбий мәшиқ қилиш мәркизи қуруп беридикән. Бу йәргә йәнә мәхсус туралғу бина, мәмурийәт бинаси вә башқиларниму қурулидикән һәм хитай тәрәп бу орунларни әслиһәләр билән тәминләйдикән.

Мәзкур қурулуш лайиһилирини ишләп чиқишни хитай мутәхәссислири зиммисигә алидикән.

Таҗикистан тәрәп болса хитай мутәхәссислириниң бихәтәрликини қоғдаш вә башқиларға мәсул болидикән.

Хәвәрдә дейилишичә, хитай тәрәп қурулушқа мунасивәтлик барлиқ баҗ, таможна беҗи вә башқа чиқимлардин хали қилинидикән.

Инкаслардин мәлум болушичә, таҗикистан, афғанистан вә уйғур дияри тутишидиған памир райони хитай үчүн әң сәзгүр район һесаблиниду.

Пәрғанә учур торидики хәвәрләрдә көрситилишичә, нөвәттә, хитай таҗикистанниң асаслиқ иқтисадий мәбләғ салғучи шерикигә айланған болуп, таҗикистан хитайға көп миқдарда қәрзгә боғулған, таҗикистанниң омумий қәрз миқдари бир милярд доллардин артуқ икән.

Хитай нөвәттә таҗикистанниң електр истансилири қурулуши вә башқа хели коп қурулуш саһәсигә мәбләғ салған вә бир қисим завут-фабрикиларни қурушқа киришкән.

Таҗикистан учур васитилиридин мәлум болушичә, бейҗиң таҗикистанға 2018-йилиғичә 6 милярд доллар мәбләғ аҗритидиған болуп, буниң көп қисми уйғур райони билән мәркизи асияни туташтуридиған мәркизи асия-хитай тәбиий газ туруба линийисиниң таҗикистандики 400 километирлиқ қисмини яшқа ишлитилидикән.

Пикирләр (0)
Share
Толуқ бәт