Xitay tajikistan'gha bir milyard 600 milyon dollar meblegh sélip, alyumin zawuti quridiken

Tajikistan da'iriliri jüme küni xitayning tajikistan'gha bir milyard 600 milyon dollar mebghel sélip, bir alyumin zawuti qurudighanliqini élan qildi. Fransiye agéntliqining ilgiri sürishiche, bu qurulush béyjingning ottura asiyadiki bu taghliq döletke bolghan iqtisadi tesiri küchiyiwatqanliqining bishariti iken.

Dölet igidarchiliqidiki tajikistan alyumin shirkitining bayanatchisi igor sattarof jüme küni fransiye agéntliqigha bergen uchurida, tajikistanning bu qurulushini yünnen ölkilik qurulush lahiyelesh guruhi bilen hemkarliqta élip baridighanliqini bildürgen.

Xitay tajikistanni qerz bilen teminligüchi eng chong dölet bolup, uning tajikistan'gha bergen qerz sommisi tajikistan tashqi qerzining 50 pirsentini igileydiken. Fransiye agéntliqining bildürüshiche, xitay uzundin béri rusiyening en'eniwiy arqa hoylisi dep qarilip kelgen tajikistan bilen bolghan munasiwitini kücheytishke tiriship kelgen iken.

Közetküchiler, xitayning tajikistanni Uyghur aptonom rayonining muqimliq mesilisidiki ajiz halqa dep qaraydighanliqini, shuning üchün xitayning tajikistan bilen bolghan munasiwitini tereqqiy qildurushqa ehmiyet bériwatqanliqini qeyt qilip kelgen idi.

Igor sattar, alyumin zawutining tajikistanning gherbidiki tursunzade dégen bazarda qurulidighanliqini, uning yilliq ishlepchiqirish iqtidarining 500 ming tonnigha yétidighanliqini bildürgen.

Fransiye agéntliqining qeyt qilishiche, tajikistanning mezkur rayondiki alyumin zawutining yilliq ishlepchiqirish iqtidari 500 ming tonna bolsimu, biraq hazir yiligha aran 76 ming tonna alyumin ishlepchiqiralaydiken. Lékin xewerde mezkur alyumin zawuti qurulushining ragon su éliktir istansisi qurulushining pütüp, yéterlik tok bilen teminlesh-teminliyelmeslikige baghliq ikenlikini, tajikistanning bu qurulushni püttürüshi üchün yene 4 amérika milyard dollirigha ihtiyajliq ikenlikini bildürgen.