Хитай афғанистандики 1 тирилйон долларлиқ тәбиий байлиққа көз тиккән

Мухбиримиз җәвлан
2021-08-25
Share

Талибан күчлириниң афғанистанни қолиға елиштин илгирила хитай билән учришиши хәлқараниң диққитини қозғиғаниди. Талибанлар һакимийәтни игилигәндин кейин болса, хитайниң улар билән техиму йеқин болуп кәткәнлики оттуриға чиқти.

"биломберг хәвәрлири" дә елан қилинған бир мақалидә көрситилишичә, америка вә униң иттипақдашлири афғанистандин алдирап чекиниватқан бу мәзгилдә, хитайниң диққити афғанистандики қиммәтлик тәбиий байлиққа мәркәзләшкән. Хитайниң дөләт таратқулири вә хитай анализчилири талибанниң қолидики афғанистанниң байлиқни ечиш һәққидә қизғин сөһбәтләрни башлиған.

Мақалидә ейтилишичә, бүгүнки күндә әқлий телефонлар вә еликтирлиқ машиниларға ишлитилидиған надир топа билән литий маддисиға болған еһтияҗ күчийиватқан болуп, афғанистанда бу тәбиий байлиқлар мол икән, қиммити 1 тирилйон доллардин ашидикән. Өткән 40 йилда афғанистанда үзүлмәй давамлишип кәлгән уруш түпәйлидин сабиқ совет иттипақи, русийә вә американиң бу байлиқлардин ечип пайдилиниши тосқунлуққа учриған.

Әмдиликтә хитай бу қиммәтлик байлиққа көз тикиватқан болуп, қошна дөләт пакистанға салған 60 милярд долларлиқ ул әслиһә қурулушиға тайинип, афғанистандики у хам әшяларни қезиш вә хитайдики завутлириға тошуш имканийитигә игә икән. Әмма буниң үчүн талибан күчлириниң афғанистанда толуқ муқимлиқ орнитиши вә район бихәтәрликини сақлиши керәк икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт