Xitay afghanistandiki 1 tirilyon dollarliq tebi'iy bayliqqa köz tikken

Muxbirimiz jewlan
2021-08-25
Share

Taliban küchlirining afghanistanni qoligha élishtin ilgirila xitay bilen uchrishishi xelq'araning diqqitini qozghighanidi. Talibanlar hakimiyetni igiligendin kéyin bolsa, xitayning ular bilen téximu yéqin bolup ketkenliki otturigha chiqti.

“Bilombérg xewerliri” de élan qilin'ghan bir maqalide körsitilishiche, amérika we uning ittipaqdashliri afghanistandin aldirap chékiniwatqan bu mezgilde, xitayning diqqiti afghanistandiki qimmetlik tebi'iy bayliqqa merkezleshken. Xitayning dölet taratquliri we xitay analizchiliri talibanning qolidiki afghanistanning bayliqni échish heqqide qizghin söhbetlerni bashlighan.

Maqalide éytilishiche, bügünki künde eqliy téléfonlar we éliktirliq mashinilargha ishlitilidighan nadir topa bilen litiy maddisigha bolghan éhtiyaj küchiyiwatqan bolup, afghanistanda bu tebi'iy bayliqlar mol iken, qimmiti 1 tirilyon dollardin ashidiken. Ötken 40 yilda afghanistanda üzülmey dawamliship kelgen urush tüpeylidin sabiq sowét ittipaqi, rusiye we amérikaning bu bayliqlardin échip paydilinishi tosqunluqqa uchrighan.

Emdilikte xitay bu qimmetlik bayliqqa köz tikiwatqan bolup, qoshna dölet pakistan'gha salghan 60 milyard dollarliq ul eslihe qurulushigha tayinip, afghanistandiki u xam eshyalarni qézish we xitaydiki zawutlirigha toshush imkaniyitige ige iken. Emma buning üchün taliban küchlirining afghanistanda toluq muqimliq ornitishi we rayon bixeterlikini saqlishi kérek iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet