Taliban afghanistan hökümiti bilen ürümchide tinchliq söhbiti ötküzgenlikini ret qilghan

“Amérika awazi radi'osi”ning bügünki xewirige qarighanda, talibanlar öz wekillirini ürümchige ewetip xitayning yarashturushi arqisida afghanistan hökümiti bilen tinchliq söhbiti ötküzgen, dégen xewerni keskin ret qilghan.

“Wal-strit zhurnili” tarqatqan xewerge qarighanda, talibanlarning 4 neper wekili ötken hepte mexpiy halda ürümchige kélip afghanistan aliy tinchliq kéngishining wekilliri bilen xitay hökümitining yarashturushi arqisida 2 kün'ge sozulghan tinchliq söhbiti ötküzgenliki melum.

“Wal-strit zhurnili” yene mezkur mexpiy söhbetning 19-we 20-may künliri ötküzülgen bolushi mumkinlikini ilgiri sürgen. Halbuki, meyli xitay terep bolsun yaki pakistan bolsun bu heqtiki xewerge héchqandaq inkas qayturmighan.

Talibanlarning bayanatchisi zebihulla mujahid bügün “Amérika awazi” gha bayanat bérip mundaq dégen: “Biz bu pitne-ighwani keskin ret qilimiz. Düshmenler mushundaq pitne-ighwa tépip, rezil teshwiqat élip bériwatidu, xalas!”

Közetküchiler, xitay we uning eng yéqin ittipaqdishi bolghan pakistanning yéqindin buyan afghanistan hökümiti bilen talibanlar otturisida mushundaq bir mexpiy söhbet uyushturush mumkinchilikining tamamen yoq emeslikini ilgiri sürmekte.