Xitay terep talibanlar bilen afghanistanning kelgüsi heqqide "Ünümlük" söhbet élip barghanliqini bildürgen

Muxbirimiz jewlan
2021-08-25
Share

"Amérika birleshme agéntliqi" ning xewirige qarighanda, xitay hökümiti taliban wekilliri bilen xitayning kabuldiki elchixanisida söhbetleshken. Söhbettin kéyin xitay hökümiti taliban terep bilen "Ochuq we ünümlük" söhbetleshkenliki hemde muhim mesililer üstide kéngeshkenlikini bildürgen.

Bu söhbette, xitayning afghanistanda turushluq bash elchisi wang yü bilen taliban hökümet ishxanisining mu'awin mudiri abdusalam henefining némilerni déyishkenliki namelum bolsimu, xitay tashqiy ishlar bayanatchisi wang wénbining bildürüshiche, xitay hökümiti hazir talibanni ikki dölet otturisidiki muhim mesililerni ortaq muzakire qilidighan hökümet dep tonuydiken. Xitayning kabuldiki elchixanisi her waqit ochuq bolup, taliban wekilliri xitay terep bilen xalighan chaghda söhbet, muzakire élip barlaydiken.

Xitay tashqiy ishlar bayanatchisi wang wénbin 25-awghust ötküzülgen axbarat élan qilish yighinida mundaq dégen: "Biz afghanistanning igilik hoquqi we zémin pütünlükige hörmet qilimiz, afghanistanning ichkiy ishlirigha arilashmaymiz, afghanistan bilen inaq qoshnidarchiliq ornitimiz we bu munasiwetni tereqqiy qildurimiz, afghanistanning tinchliqi we qayta güllinishi üchün berpachiliq rol oynaymiz".

Taliban küchliri afghanistanda hakimiyet béshigha kélishtin burun, taliban rehbiri molla abdulgheni burader aldinqi ayda xitayni ziyaret qilip, xitay tashqiy ishlar minsitiri wang yi bilen körüshkenidi.

Analizchilarning bildürüshiche, afghanistanning weziyiti téxi toluq muqimlashmighan ehwalda, xitay wekilliri bilen taliban otturisidiki söhbetning bundaq qizip kétishi xitayning bu rayonda tesir küchi eng zor döletke aylinish qara niyitini bildüridiken. Bu söhbetlerde yene xitay bilen talibanning Uyghurlar mesiliside qandaq shumluqlarni pilanlawatqanliqi téxi namelum bolsimu, talibanning bu dölette qapsilip qalghan Uyghurlarni kozér qilip paydilinidighanliqi we nurghun menpe'etler bedilige ularni az-azdin xitaygha ötküzüp béridighanliqi texmin qilinmaqta iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet