Xitay hökümiti talibanlargha yéngi tekliplerni sundi

Muxbirimiz eziz
2020-09-11

Amérika armiyesining afghanistandin chékinip chiqishigha egiship xitay hökümitining tézdin bu rayon'gha qol tiqishqa aldirawatqanliqi yéqindin buyan zor diqqet qozghashqa bashlidi.

“Maliye waqti” gézitining 8-séntebirdiki xewiride éytilishiche, xitay hökümiti afghanistandiki taliban küchlirige yéngidin teklip sunup: “Amérika armiyesi chékin'gendin kéyin, taliban hakimiyiti afghanistanning tinchliqigha képillik qilsa xitay hökümiti bir qatar yol qurulushi bilen temin étidu,” dégen.

Xewerde éytilishiche, taliban küchliri bilen yéqin munasiwettiki ikki neper yuqiri derijilik qebile aqsaqili bu ishlarni ashkarilighan bolup, béyjing da'iriliri talibanlar bilen bolghan ötken üch ayliq söhbet jeryanida özlirining “Énérgiye we ul mu'essese qurulushigha salmaqliq meblegh salidighanliqi” ni bildürgen. Ularning bildürüshiche, xitay hökümiti buningda afghanistandiki herqaysi chong sheherlerni bir-birige tutashturidighan tashyol qurulushini közde tutmaqta iken.

Xewerde éytilishiche, pakistan hökümitidiki yuqiri derijilik yene bir emeldar tramp hökümiti afghanistandin esker chékindürüshni bashlighandin buyan xitay hökümitining talibanlar bilen izchil söhbette bolup kéliwatqanliqini delilligen. Shuningdek bu jeryanda afghanistanda yéngidin “Térrorluq” bilen munasiwetlik hadisilerning körülmesliki alahide tekitlen'gen. Sin'gapordiki xewpsizlik mesililiri tetqiqatchisi jéymis dorséy bu heqte toxtilip: “Shübhisizki, afghanistan tash sanap bolghuche xitay hökümiti qum sanap bolmaqchi boluwatidu. Ular mushu arqiliq özlirining chégrasigha yéqin jaylarda bashqiche ehwallarning körülüp qélishidin ensirimekte,” dégen.

Melum bolushiche, xitay hökümiti izchil muhajirettiki bir qisim Uyghurlarning “Sherqiy türkistan islam herikiti” namliq teshkilat qurghanliqi hemde ularning talibanlarning we osame bin ladin qurghan “El-qa'ide” teshkilatining yardimige érishkenlikini tekitlep kelgen idi.