Amérika tamozhna we chégra qoghdash idarisi “Uyghur mejburiy emgikining aldini élish qanuni” gha ri'aye qilish qollanmisi élan qilghan

Amérika tamozhna we chégra qoghdash idarisi 2022-yil 6-ayning 21-künidin bashlap ijra qilinidighan “Uyghur mejburiy emgikining aldini élish qanuni” gha ri'aye qilish qollanmisi élan qilghan.

“Léksologiye” (Lexology) torida élan qilin'ghan tepsiliy uchurlargha qarighanda, mezkur qollanma üchün mexsus tor békiti qurulghan bolup, uningda Uyghur mejburiy emgikige munasiwetlik körsetmiler, so'al-jawablar, tor muhakime yighinliri, resim we amérika tamozhna we chégra qoghdash idarisi (CBP) bilen alaqilishish uchurliri bérilgen.

Melum bolushiche, amérika tamozhna we chégra qoghdash idarisi xitaydin mal imort qilghuchi shirketlerge qerellik türde mektup yollap, mejburiy emgek mehsulatliri toghruluq uchur we körsetme béridiken. Eger mal import qilghuchi shirketler “Uyghur mejburiy emgikning aldini élish qanuni” gha xilapliq qilsa, mallirining tutup qélinidighanliqi, musadire qilinidighanliqi yaki jarimane qoyulidighanliqi toghruluq agahlandurush bérilgen.

Amérika tamozhna we chégra qoghdash idarisi bu heqte konkrét belgilimilerni tüzmigen, emma xitaydin mal import qilghuchi shirketlerning choqum “Uyghur mejburiy emgikining aldini élish qanuni” gha emel qilishini, buninggha munasiwetlik qa'ide-nizamlarni tüzüp chiqip, mejburiy emgek mehsulatlirigha chétilip qalmasliqqa kapaletlik qilishni telep qilghan.

“Uyghur mejburiy emgikining aldini élish qanuni” gha ri'aye qilish qollanmisida mal teminligüchi shirketning mal menbesini qerellik tekshürüsh, eger ularning mejburiy emgek bilen chétishliqi bolup qalsa derhal shirket almashturush, mal sétiwélish toxtimigha mejburiy emgek mehsulatliri we shinjangdin kelgen mehsulatlarni cheklesh heqqidiki mezmunlarni qoshush, mejburiy emgek we shinjangdin mal sétiwélish heqqide yilliq iqtisadiy teptish qilish, xitay zawutliridiki ishchilarning ehwalini igilesh qatarliq körsetmiler bérilgen.