Tarim néfit shirkiti hazirghiche 300 milyon tonnidin artuq néfit qiziwalghan

Muxbirimiz erkin
2018-04-16
Élxet
Pikir
Share
Print

Tarim néfit shirkiti xitay dölet néfit shirkitige qarashliq bolup, mezkur shirket qurulghandin tartip hazirghiche 300 milyon tonnidin artuq néfit ishlepchiqarghan.

Shinxu'a agéntliqining düshenbe küni xewer qilishiche, bu shirket xitay dölet néfit shirkiti ishlepchiqarghan yilliq omumiy néfit miqdarining 7 den bir qismini, tebi'iy gaz miqdarining 6 den bir qismini teshkil qilidiken.

Tarim néfit shirkiti 1989‏-yili qurulghan bolup, u qurulghan deslepki yili 33 ming 900 tonna néfit ishlepchiqarghan idi. Lékin tarim néfit shirkitining düshenbe küni ashkarilishiche, mezkur shirket qurulghan yéqinqi 30 yilda uning néfit we tebi'iy gaz ishlepchiqirish miqdari shiddetlik köpiyip, hazir xitaydiki 3‏-chong néfit we tebi'iy gaz ishlepchiqiridighan tarmaq shirketke aylan'ghan.

Shinxu'a agéntliqining xewiride, tarim néfit shirkiti xitayning énérgiye bixeterlikige kapaletlik qilish, Uyghur aptonom rayonining ijtima'iy, iqtisadi tereqqiyatida achquchluq rol oynighanliqini bildürgen bolsimu, lékin konkrét qandaq halqiliq rol oynighanliqi tilgha élinmighan.

Uyghur rayoni mol néfit, tebi'iy gaz zapisigha ige bolsimu, lékin bu tebi'iy gaz-néfitlik jaylashqan 22 nahiye xitaydiki eng namrat nahiyeler hésablinidu. Bu ehwal Uyghur jem'iyiti we teshkilatlirining izchil naraziliqini qozghap kelgen. Ularning ilgiri sürüshiche, bu bayliqlarni dölet monopol qiliwélip, yerlik Uyghurlarning ishqa orunlishishi, uningdin özining iqtisadi, ijtima'iy, medeniyet, kishilik tereqqiyati paydilinishigha héchqandaq yol qoymighan.

Bezi analizchilar, bu Uyghur rayonidiki muqimsizliqning asasliq sewebchisi ikenlikini ilgiri sürüp keldi. Shinxu'a agéntliqining bildürüshiche, tarim néfit shirkiti 2017‏-yili 25 milyon 400 ming tonna néfit, 25 milyard 300 ming küp métir tebi'iy gaz ishlepchiqarghan bolup, 2020‏-yilghiche yilliq néfit ishlepchiqirishni 30 milyon tonnigha yetküzüshni pilanlimaqta iken.

Toluq bet