Тарим ойманлиқида әң чоң нефит записи байқалди

Мухбиримиз әзиз
2016-04-20
Share

Хитайдики "сина тори" вә башқа хитайчә тор мәнбәлириниң учурлиридин мәлум болушичә, уйғурлар дияридики тарим ойманлиқидин тарихтики әң чоң нефит базиси байқалған.

Йеңидин байқалған бу нефитликниң запас нефит миқдари төт милярд тонниға йеқин болуп, тәбиий газ запас миқдари икки тирилйон купметир икән. Униңдин башқа бу нефитлик тәвәсидики запас көмүр миқдари 188 милярд тоннидин ашидикән. Мутәхәссисләрниң тәкшүрүшичә, мәзкур нефитлик әтрапида йәнә зор миқдарда уран записи бар икән.

Хитай һазир дунядики әң чоң нефит импорт қилғучи дөләт болуп, мәзкур нефитликтә рәсмий қезиш башланса хитайниң нефит импорти зор дәриҗидә азийидикән. Алақидар учурлардин мәлум болушичә, хитайниң дачиң вә башқа нефитликлири һазир ишләпчиқириштин тохтиған болғачқа, мәзкур нефитлик хитай санаитиниң кәлгүси тәрәққияти үчүн һәл қилғуч әһмийәткә игә икән.

Алақидар мәлуматларда көрситилишичә, сәуди әрәбистанниң һазирқи омумий нефит записи 38 милярд тонна болуп, дуня нефит записиниң бәштин бирини тәшкил қилидикән. Хитайниң һазирчә мәлум болған омумий нефит записи төт милярд тонниға йеқин болуп, тарим нефитликидики йеңидин байқалған бу нефит записи хитайниң һазирқи нефит записидинму көп икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт