Xitay hökümitining Uyghurlarni tarqaqlashturush pilani dawamlashmaqta

Muxbirimiz sada
2019-06-28
Share

Xitay hökümiti Uyghurlar zich olturaqlashqan jaylardiki Uyghurlarni atalmish "Éshincha emgek küchini yötkep ishqa orunlashturush" namida xitay ölkilirige yötkewatqan bolsa, emdilikte ürümchining Uyghurlar nopusi köp salmaqni igileydighan konasheher rayonidiki Uyghur ahalilirini bashqa rayonlargha tarqaqlashturushqa bashlighan.

"Tengritagh tori" ning 28-iyundiki sanigha bésilghan munasiwetlik xewerdin melum bolushiche, ürümchining "Kona sheher" rayoni, yeni hazirqi tengritagh bilen saybagh rayoni qatarliq Uyghurlar topliship olturaqlashqan jaylardiki Uyghur ahaliliri atalmish "Zamaniwiyliqqa ige xelq'araliq sheher berpa qilish" namida bashqa rayonlargha sélin'ghan bina öylerge köchürülgen. Igilinishiche, bu yerdiki "Bashqa rayonlar" xitay nopusi köp salmaqni igileydighan rayonlar iken.

Xewerde yene ürümchi tengritagh rayonidiki qaqas tagh "Qarliqachliq" ning bu yil apréldin bashlap  kökertilip orman berpa qilin'ghanliqimu tilgha élin'ghan. Analizchilar buni xitay hökümitining bu jaygha xitay puqralirini ekélip orunlashturushining aldinqi basquch xizmiti bolushi mumkinlikini texmin qilmaqta.

Ötken mezgilde xitay hökümiti qeshqer konasheher rayonini "Özgertip qurush" namida shu jayda olturushluq Uyghur ahalilerni bashqa jaylargha sélin'ghan bina öylerge köchürgen idi.

Közetküchiler bu heqte analiz yürgüzüp, xitay hökümiti Uyghurlar topliship olturaqlashqan rayonlar we mehellilerdin "Xewp" hés qilidighanliqi üchün ularni yötkep, rayondiki topliship olturaqlashqan Uyghur ahalilirini tarqaqlashturush we shalanglashturush meqsitige yetmekchi boluwatqanliqini ilgiri sürmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet