Тибәтлик актип паалийәтчи таши «бөлгүнчилик» билән әйиблинип сотқа тартилған

Мухбиримиз ирадә
2018-01-04
Елхәт
Пикир
Share
Принт

Бирләшмә агентлиқиниң хәвәр қилишичә, бүгүн тибәтлик паалийәтчи таши ваңчук «бөлгүнчилик» билән әйиблинип сотланған. Униң адовкатиниң мухбирларға билдүрүшичә, чиңхәйдики сотта хитай сотчилар таши ваңчукниң 2015-йили «ню-йорк вақти гезити» ишлигән бир бир син хәвиридә қилған сөзини униң аталмиш «бөлгүнчилик» қилмишиниң дәлили қилип көрсәткән.

9 Минутлуқ бу син хәвиридә таши ваңчук тибәт мәдәнийити билән тибәт тилиниң чәклимигә учраватқанлиқи, тибәтләрниң бесим вә қорқунч ичидә яшаватқанлиқини билдүргән. У мәзкур син хәвири дуняға тарқитилип аридин 2 ай өткәндә, йәни 2016-йили январда қолға елинған.

Бүгүн чиңхәйдә өткүзүлгән сотта тибәт тутқун таши өзиниң аталмиш «җинайәтлири» ни етирап қилмиған. Сот 4 саәт давам қилған болуп, сот һөкүминиң қачан елан қилинидиғанлиқи мәлум әмәс икән.

Униң адвокати ляң шавҗүнниң бирләшмә агентлиқиға қилған сөзидин мәлум болушичә, әгәр ташиға аталмиш «бөлгүнчилик» җинайити бекитилгән тәқдирдә 5 йилдин 15 йилғичә қамақ җазасиға һөкүм қилиниши мумкин икән.

Бирләшмә агентлиқиниң мәзкур хәвиридә, хитайда уйғур, тибәт вә моңғул қатарлиқ милләтләрниң өз һоқуқини қоғдаш үчүн қилған һәрикәтлириниң давамлиқ «бөлгүнчилик» җинайити билән әйиблинидиғанлиқини билдүргән. Хәвәрдә йәнә хитай һөкүмитиниң уйғур елидики сиясәтлирини очуқ - ашкара тәнқид қилған уйғур зиялийси илһам тохтини өмүрлүк қамақ җазасиға буйруғанлиқи вә шундақла хитайниң бу иш түпәйли хәлқара кишилик һоқуқ органлириниң күчлүк тәнқидигә учриғанлиқи баян қилинған.

Пикирләр (0)
Share
Толуқ бәт