Tibetlik aktip pa'aliyetchi tashi "Bölgünchilik" bilen eyiblinip sotqa tartilghan

Muxbirimiz irade
2018-01-04
Élxet
Pikir
Share
Print

Birleshme agéntliqining xewer qilishiche, bügün tibetlik pa'aliyetchi tashi wangchuk "Bölgünchilik" bilen eyiblinip sotlan'ghan. Uning adowkatining muxbirlargha bildürüshiche, chingxeydiki sotta xitay sotchilar tashi wangchukning 2015-yili "Nyu-york waqti géziti" ishligen bir bir sin xewiride qilghan sözini uning atalmish "Bölgünchilik" qilmishining delili qilip körsetken.

9 Minutluq bu sin xewiride tashi wangchuk tibet medeniyiti bilen tibet tilining cheklimige uchrawatqanliqi, tibetlerning bésim we qorqunch ichide yashawatqanliqini bildürgen. U mezkur sin xewiri dunyagha tarqitilip aridin 2 ay ötkende, yeni 2016-yili yanwarda qolgha élin'ghan.

Bügün chingxeyde ötküzülgen sotta tibet tutqun tashi özining atalmish "Jinayetliri" ni étirap qilmighan. Sot 4 sa'et dawam qilghan bolup, sot hökümining qachan élan qilinidighanliqi melum emes iken.

Uning adwokati lyang shawjünning birleshme agéntliqigha qilghan sözidin melum bolushiche, eger tashigha atalmish "Bölgünchilik" jinayiti békitilgen teqdirde 5 yildin 15 yilghiche qamaq jazasigha höküm qilinishi mumkin iken.

Birleshme agéntliqining mezkur xewiride, xitayda Uyghur, tibet we mongghul qatarliq milletlerning öz hoquqini qoghdash üchün qilghan heriketlirining dawamliq "Bölgünchilik" jinayiti bilen eyiblinidighanliqini bildürgen. Xewerde yene xitay hökümitining Uyghur élidiki siyasetlirini ochuq - ashkara tenqid qilghan Uyghur ziyaliysi ilham toxtini ömürlük qamaq jazasigha buyrughanliqi we shundaqla xitayning bu ish tüpeyli xelq'ara kishilik hoquq organlirining küchlük tenqidige uchrighanliqi bayan qilin'ghan.

Toluq bet