Тайланд даирилири так өлкисиниң мой сот районида уйғур мусапирлириға ярдәм қилған бир “қачақчи”ни ахтурғанлиқини билдүрди

Мухбиримиз әркин
2016-10-07
Share

Тайланд сақчи даирилири җүмә күни тайландниң так өлкиси мой сот районида елип барған ахтуруш һәрикити уйғур мусапирлирини йөткәшкә четишлиқ алий исимлик бир кишигә қаритилғанлиқини билдүргән.

Тайландлиқ сақчи вә әскәрләр тайланд-бирма чеграсидики мой сот районида “һаят” намлиқ бир сода ширкитиниң бинасини ахтуруп, 3 нәпәр бирмалиқ мусапирни тутқан, әмма алиниң из-дерикигә еришәлмигән. Тайланд ахбарати, алиниң 2015‏-йили 8‏-айда баңкоктики ериван ибадәтханисида йүз бәргән партлашқа четишлиқ икәнликини, ахтурушниң шуни нишан қилғанлиқини илгири сүргән иди.

Әмма мой сот районлуқ сақчи әмәлдари полковник җамраң судҗай, алиниң партлашқа четишлиқ икәнликини рәт қилип, униң дөләт бихәтәрликигә четишлиқ мәлум бир җинайәткә бағлинишлиқ икәнликини, униң үстидин техи тутуш буйруқи чиқирилмиғанлиқини билдүргән. У, “әгәр биз уни тапалисақ, һәрбий идарә қануни бойичә тутуп туримиз”дегән. Тайланд сақчи даирилириниң қәйт қилишичә, али қачақчилиқ һәрикәтлиригә четишлиқ болуп, у уйғур мусапирлирини сахта паспорт билән тәминләш ишлириға арилашқан.

Тайланд һөкүмити баңкок партлаш вәқәсини инсан қачақчилириниң өч елиш һәрикити, дәп елан қилип, мирәли йүсүп, билал муһәммәт исимлик икки уйғурни партлашқа четишлиқ, дәп рәсмий сотқа тартқан.

Әмма мирәли йүсүп вә билал муһәммәт партлашқа четишлиқ икәнликини рәт қилған. Уйғур кишилик һоқуқ тәшкилатлири тайланд даирилирини очуқ-ашкара болушқа чақирған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт