Tayland da'iriliri türmidin qachqan Uyghurlarni jiddiy izdimekte

Muxbirimiz eziz
2017-11-21
Share

20-Noyabirda taylandning songkla ölkisidiki chégragha yéqin bolghan bir yighiwélish merkizidin 20 Uyghur qéchip ketkendin kéyin bu weqe tayland we xitay da'irilirini pat-paraq qiliwetken.

Taylandtiki eng chong gézitlerdin bolghan "Dölet" gézitining 21-noyabirdiki xewiride éytilishiche, tayland bash saqchi mehkimisi Uyghur mehbuslar qachqan yighiwélish ornining alte saqchi emeldarini "Mes'uliyet tekshürüshi" üchün chaqirtip ketken. 

Roytérs agéntliqining 21-noyabirdiki xewiride éytilishiche, xitay hökümiti tayland hökümitidin "Qéchip ketken 20 Uyghurni tézdin 'adalet soti' gha qayturup kélish" ni telep qilghan. Roytérsning tayland saqchi da'iriliridin neqil keltürüshiche, nöwette bu Uyghurlardin 5 kishi tutulghan bolup, 15 Uyghur dawamliq qéchip yürmekte iken. 

Tayland da'iriliri buningdin ilgiri xitay terep: "Bu Uyghurlar esebiy diniy teshkilatlargha qatnishish üchün atlan'ghanlar" dégen pikirge qoshulmaydighanliqini, chünki bu Uyghurlarning héchqandaq qoralliqlar guruhigha baghlinishliq emeslikini ilgiri sürgen. Taylandning chularajmonti rayondiki musulmanlarning lidéri, doktor wisut binlatih bu heqte söz qilip: "Qachqan Uyghurlar xotun-baliliri bilen jem bolush üchün qachti" dégen. Roytérsning xewiride éytilishiche, Uyghur milliy herikitining rehbiri rabiye qadir xanim bu heqte bayanat élan qilip: "Bu Uyghurlar xitay hökümitining ziyankeshliki sewebidin sherqiy jenubiy asiyagha qéchishqa mejbur bolghanlar" dégen. 

Melum bolushiche, sherqiy jenubiy asiyadiki qachqunluq sepiride taylandta qolgha élin'ghan Uyghurlardin hazirghiche héchnege kételmey, taylandning yighiwélish merkezliride turuwatqan 61 neper Uyghur bar iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.