50 Тин артуқ уйғур тәшкилати тайландни уйғур мусапирлирини қоюп беришкә чақирди

Мухбиримиз әркин
2022.07.13
Share on WhatsApp
Share on WhatsApp

Дунядики 50 тин артуқ уйғур тәшкилати 8-июл күни, тайланд даирилириниң 109 нәпәр уйғур мусапирини хитайға қайтуруп бәргәнликиниң 8 йиллиқи мунасивити билән чақириқ елан қилип, тайланд даирилирини тайланд тутуп туруш мәркәзлиридики 52 нәпәр уйғур мусапирини қоюп беришкә чақирған. Чақириқта, “алақидар һөкүмәтләрниң тайланд һөкүмити билән һәмкарлишип, уйғур мусапирлириниң хитайға қайтурулмайдиған бихәтәр 3-бир дөләткә өткүзүп берилишигә капаләтлик қилиши” ни тәләп қилған. Чақириқта тәкитлинишичә, “шәрқий түркистанда ирқий қирғинчилиқ әвҗигә чиққан бир вақитта, хитай сиртидики уйғурлар зиянкәшликкә учраш, нурғун әһвалларда чеградин қоғлап чиқирилиштәк хәвпкә дуч келип, қоғдилишқа җиддиий еһтияҗи чүшмәктә” икән.

Бу чақириқ америка дөләт мәҗлисидә қанун тәклип лайиһәси сунулуп, хитайға қайтурулуш хәвпи мәвҗут болған дөләтләрдики уйғур мусапирлирини қоғдаш тәләп қилинған, канада парламентиниң кишилик һоқуқ вә көчмәнләр комитетлири һөкүмәткә тәләп қоюп, уйғур мусапирлириға алаһидә мусапирлиқ салаһийити берип, уларни канадаға орунлаштурушни тәләп қилған бир вақитта елан қилинди. Чақириқта ейтилишичә, нөвәттә тайландтики тутуп туруш мәркәзлиридә 52 нәпәр уйғур мусапири 8 йилдин бери интайин начар, ғәйрий инсани шараитта тутуп турулуватқан болуп, улардин аз дегәндә 3 яшлиқ бир оғул балини өз ‍ичигә алған 2 адәм ‍өлгән. Қалғанлар мувапиқ давалинишқа еришәлмәслик нәтиҗисидә җисманий вә роһий дәпсәндичиликкә учрап кәлмәктикән.

2013-Йилдин 2015-йилғичә болған арилиқта, хитайниң сиясий вә диний зиянкәшликидин қачқан нурғун уйғурлар хитайниң шәрқий-җәнубийдики ‍өлкә-аптоном районлардин шәрқий-җәнубий асия арқилиқ түркийәгә қачқан. Бу җәрянда нурғун уйғурлар тайланд, вийетнам, камбоджа, бирма, малайсия қатарлиқ дөләтләрдә тутулуп қелип, хитайға қайтуруп берилгән. Тайланд һөкүмити 2015-йили 7-айда аз дегән дә 109 нәпәр уйғурни хитайдин кәлгән мәхсус бир айропиланға селип, бейҗиңға өткүзүп бәргән. Шуниңдин бери бу уйғурларниң һечқандақ учури елинмиғаниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.