Тайланд түрмисидики 3 нәпәр уйғур түрмидин қачқан

Мухбиримиз ирадә
2022.07.14
Share on WhatsApp
Share on WhatsApp

Тайланд сақчи даирилири 14- июл пәйшәнбә күни, тайландтики түрмидә он йилға йеқин вақиттин бери тутуп турулуватқан уйғур тутқунлардин 3 нәпириниң қечип кәткәнликини елан қилған.

“бинар хәвәрлири” ториниң билдүрүшичә, бу мәзкур 3 нәпәр уйғур тутқун мушу һәптиниң бешида банкокниң җәнубидин тәхминән 320 киломитер йирақлиқтики прачуап хирихан өлкисидики тутуп туруш орнидин қечип кәткән болуп, һазир сақчилар уларни җиддий түрдә издимәктикән.  

Көчмәнләр идарисиниң тәкшүргүчиси раттапоң “бинар хәвәрлири” гә мундақ дегән: “биз уларни издәватимиз, мән нәқ мәйдандин доклат күтиватимән. Йеқиндин буян дәм елиш күнлири сәвәбидин ишлар бир аз аста болуп қалди.”

Униң ейтишичә, қечип кәткәнләрдин әли 25 яш, абдулла 30 яш, йәнә бир абдулла исимлик бири 29 яш икән. Тайланд сақчи даирилири уларниң өткүр кәскүчи әсваб арқилиқ төмүр ришаткиларни кесип қачқанлиқини билдүргән.

Түрмидин қачқан йоқуриқи 3 нәпәр уйғур тутқун 2013-2014-йиллири арисида хитайдин қечип чиқип, малайсия арқилиқ түркийә қатарлиқ бихәтәр дөләтләргә кетиш арзуси билән тайланд чиграсидин қанунсиз киргәндә қолға елинған икән. Нөвәттә тайландтики һәрқайси түрмә вә тутуп туруш орунлирида 52 дин 56 нәпәргичә уйғурниң тутуп туруливатқанлиқи мөлчәрләнмәктә.

Тайланд әмәлдарлириниң “бинар хәвәрлири” гә ейтишичә, 2013-вә 2014-йиллири арисида тәхминән 475 нәпәр уйғур мусапир тайландқа қечип киргән икән.

Бу уйғур мусапирлириға ярдәм берип келиватқан тайланд аммиви тәшкилатлар фонди җәмийитиниң рәиси чалида таҗароенсук “бинар хәвәрлири” гә қилған сөзидә, уйғурларниң тутуп турулуватқанлиқиға 10 йил болай дәп қалғанлиқини, тайланд һөкүмитиниң әмди хитайниң бесимиға қаримай уларни қоюп берип, уларниң бихәтәр җайларға йөткилишигә рухсәт қилиши керәкликини билдүргән.

Дуня уйғур қурултийи қатарлиқ 52 тәшкилат йеқинда уйғур тутқунларниң тайланд түрмилиридә тутуп турулуватқанлиқиға сәккиз йил болғанлиқ мунасивити билән коллектип баянат елан қилип, тайланд даирилирини қамақтики уйғурларни дәрһал қоюп беришкә чақирған иди.

Мәзкур баянатта “шәрқий түркистанда ирқий қирғинчилиқ давам қиливатқан мушу пәйттә, биз һәрқайси һөкүмәтләрни тайланд һөкүмити билән һәмкарлишип, уйғур мусапирларни үчинчи бир бихәтәр дөләткә орунлаштурушқа чақиримиз,” дейилгән.

7-Айниң 8-күни елан қилинған мәзкур баянатта йәнә тайланд даирилириниң бундин 7 йил бурун аяллар вә балиларниму өз ичигә алған 100 гә йеқин уйғурни хитайға қайтуруп бәргәнлики тилға елинған вә тайланд һөкүмитидин қалған уйғурларниң хитайға қайтурулмаслиқиға капаләтлик қилишни тәләп қилған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.